CEBU, Philippines — Miulbo ang Bulkang Kanlaon nga naa mahimutang sa utlana sa Negros Oriental ug sa Negros Occidental kagahapon sa hapon.
Base sa nanggawas nga mga hulagway sa social media, gibanabanang moabot og 5,000 metros ang gitas-on sa itom nga aso nga gibugwak sa maong bulkan.
Base sa 24-oras nga monitoring sa Philvolcs gikan sa Hunyo 02 hangtud 03(kagahapon sa alas-12 sa udto, gibutang nila kini sa kasarangan nga alerto. Apan pagkahapon, giisa kini sa Alert Level 1 nunot sa pag-ulbo niini. Ang Philvolcs mipasidaan ng daan sa publiko nga gidili ang pagsulod upat ka kilometro gikan sa baba sa maong bulkan kay giisip na kining daan nga Permanent Danger Zone o PDZ.
Gidid-an sab ang bisan unsang matang sa abyon paglupad ibabaw sa maong bulkan ug mipasidaan nga bisan unsang orasa dunay mahitabo nga pagbuto niini nga nahitabo gyud kagahapon sa hapon.
Nalibutan ang bulkan sa mga lungsod sa maong duha ka probinsya nga mao ang La Castellana, Canlaon, Quezon, La Carlota, San Miguel.
Atol ning pagsuwat sa balita, wala pay opisyal nga gipagawas nga pamahayag ang mga lokal nga kagamhanan sa maong mga lungsod. —IBM (BANAT NEWS)