Garcia: Walay kalainan ang policy direction kang Rama
CEBU, Philippines — Giklaro ni Acting Cebu City Mayor Raymond Alvin Garcia nga walay kalainan ang iyang policy direction sa kang suspended Mayor Michael Rama apan lahi lang ang approach.
Mao kini ang gipadayag ni Garcia nunot sa reaksiyon ni Rama sa iyang policy direction diin giingong lahi kini sa iyang gitukod sa wala pa siya masuspenso sulod sa unom ka buwan.
Atol sa gipahigayong press conference kagahapon gibutyag ni Garcia nga nakatambong siya sa pista sa Rama compound niadtong Domingo sa gabii ug dili sama sa mga gituohan naglamanohay sila ni Rama.
“So I don’t think there is any problem unless naa sya’y giingon mga bati”, ni Garcia pa.
Niadtong Biyernes, si Rama nipadayag nga na-bothered siya sa mga desisyon nga gihimo ni Garcia ug supak siya sa policy direction niini.
Samtang si Garcia nagkanayon nga walay kausaban sa policy direction nga gitukod ubos sa administrasyon ni Rama ug sa iyang temporaryong pag-asumir sa katungdanan.
“Kami ni Mayor Mike pareha gyud mi’g policy direction, unsa man nga policy direction, kaayohan sa mga Sugboanon”, matud ni Garcia.
Si Garcia nisubli nga ang iyang pamaagi mas diplomasiya diin ang gipaabot nga resulta niini mahimong mas pabor ug mas malambuon.
“Let’s buckle down and let’s just work,” matud ni Garcia nga naghatag ug gibug-aton sa iyang 21 ka semana nga nahibilin isip acting mayor. (BANAT NEWS)
- Latest
