CEBU, Philippines — Gikwestyon ni acting Cebu City Mayor Raymond Alvin Garcia ang construction ug pag-ayo sa Guba Hospital nga wa pa mahuman sukad gisugdan kini sa pag-trabaho unom ka tuig na ang nilabay.
Suma pa ni Garcia atol sa press conference kagahapon, nga sayod siya nga kinahanglan na gyud nga ayuhon ang Guba Hospital base sa iyang assessment human sa ilang pag inspection sa pasilidad og nakakuha sila og pundo gikan sa Department of Health (DOH).
"In fact I would already say nga 90 to 95% of it is already complete and sa perspective sa ilang drawing perti gyung nindota however wa pa magamit because of some issues that I really have to look into," suma ni Garcia.
Dugang ni Garcia nga dako kaayo og tabang ang maong ospital hinungdan nga kinahanglan hatagan gayud kini ug pagtagad aron dili na maglisod ang mga nanimuyo sa kabukiran.
Gikatakda siya nga makigtagbo sa City Health Department ug sa Cebu City Medial Center (CCMC) aron makakuha og update sa Guba Hospital.
"Because as I have learned, six years ago pa ni nasugdan then hangtod karon, wa pa gyud mahuman or wa gihapon ma occupy, there is really a problem," dugang pa ni Garcia.
Nagkanayon ang acting mayor nga susihon niya kun unsa ang problema nganong wa pa mahuman ang maong proyekto una pa siya mopagawas sa iyang direktiba.
Si Garcia gusto nga mahatagan og maanindot nga kalambuan ang maong tambalanan hinungdan nga kun gikinahanglan makig-alayon sila sa Department of Health kinsa maoy nag finance sa proyekto. (BANAT NEWS)