Kaso sa dengue sa Central Visayas Misaka

CEBU, Philippines — Bisan sa nasinate nga kainit sa panahon misaka ngadto sa 95 percent ang kaso sa dengue sa Central Visayas Region nga niabot ngadto sa 6 mil kapin ang nataptan ug nikalas na og 14 ka kinabuhi.

Gumikan niini mipahimangno ang Department of Health sa katawhan nga hingusgan ang kampanya batok sa dengue nunot sa pag oberbar sa Hunyo isip Dengue Awareness Month.

Sa datos sa Department of Health DOH-7 miabot ngadto sa 6,282 ka kaso sa dengue sa sukad Enero ning tuiga hangtud sa Mayo diin adunay 14 ang nakalas nga gihulagway sa maong ahensya nga mas taas kini ug 95percent kon itandi sa susamang period sa nakalabay nga tuig.

Klase-klase usab ang nataptan sa balatian diin duha pa lang ka buwan ang kinabataan ug 98 anyos ang kinatiguwangan.

Matud pa ni Dr. Ronald Jarvic Buscato, Medical Officer IV sa DOH-7 nga usa sa ilang mga gitan-aw nga hinungdan sa pagtaas sa kaso sa dengue mao ang wala matarong pagpundo ug tubig atol sa huwaw nga gipangitlogan sa lamok nga nagdala og dengue. Gikonek usab nila kini sa climate change busa dili lang Hunyo ang dengue awareness kon dili sa tanang panahon matud sa DOH.

Gipanglantawan nila nga mosaka pa ang dengue cases ning pagsulod sa ting-ulan hinungdan mipahimangno ang DOH nga palamboon pa ang Search and Destroy sa mga pinoy-anan sa mga lamok. Gibutyag ni Buscato nga mas maayo, mokunsulta dayon sa labing duol nga health care facility kon adunay hilanat human sa tulo ka adlaw isip kabahin sa early detection.

Kini aron malikayan ang mortality o pagka kalas sa kinabuhi sa mga mataptan sa maong balatian. (BANAT NEWS)