CEBU, Philippines — Ipaubos sa Bohol Police Provincial Office(BPPO) sa ballistic examination ang mga armas sa duha ka mga giingong tulisan nga nakalas sa engkwentro niadtong Sabado sa gabii aron masuta kun gigamit kini sa ubang mga shooting incidents nga nahitabo sa probinsiya.
Kini maoy gibutyag ni Police Lieutenant Colonel Norman Nuez, tigpamaba sa Bohol Police Provincial Office.
Kahinumduman duha ka tulisan ang nakalas dihang dihang misukol sila sa mga operatiba sa Provincial Intelligence Unit sa BPPO nga nagpahigayon og hot pursuit operation sa Purok 1, Barangay Anislag, Lungsod sa Corella, Sabado sa gabie.
Ang maong mga tulisan nakuhaan og duha ka kalibre .45 nga armas ug kini ang gisusi karon sa kapulisan kung gigamit ba sa laing krimen ang maong mga armas.
“Wala tay impormasyon nga gun-for-hire sila pero sigurado ta nga armado sila, kalibre .45 ni, posible sad na atong ipa-check sa crime lab kun naa bay mga gipangpatay gamit ang gun-for-hire basin og mo-match sa mga armas nga gigamit ani nila,” sigon ni Nuez.
Ang grupo sa mga nakalas nga tulisan nalambigit sa pagpanulis, pagpangawat ug pagpanglabni sa Probinisya sa Bohol diin ang ilang areas of operation kay dili ang Tagbilaran City apan apil na ang mga silingan nga mga lungsod.
“Kung naa sila’y matimingan nga biktima nga murag naay oportunidad mao pud nay ilang tionan unya labnihon ang gamit so mao toy nahitabo sa Sikatuna, estudyante man tong biktima, naghuwat og de pasaheroan nga sakyanan, gitionan unya gilabni,” ni Nuez pa.
Padayon pa nga giila sa kapulisan sa Probinsiya sa Bohol ang kauban sa duha ka mga nakalas sa hitabo human kini nakaikyas. (BANAT NEWS)