CEBU, Philippines — Desidido nga mopasaka og kaso ang pamilya sa 39-anyos nga lalaki kinsa gipusil patay diha sa Kawit Street, Barangay Ermita, Siyudad sa Sugbo niadtong Huwebes sa gabii.
Sayo pa, si alyas “Kinjie”, 28-anyos, residente sa Sitio Ermita Proper, Barangay Ermita niining siyudad, usa sa mga suspetsado sa pagpamusil ang nadakpan sa kapolisan niadtong Biyernes sa gabii.
Ang pamilya sa biktima nianha sa Carbon Police Station kagahapon sa buntag diin ang inahan niini kinsa wala nagpahingan nipadayag nga mopasaka sila og kasong murder batok sa suspetsado.
Si Police Major Philip Libres, hepe sa Carbon Police Station nagkanayon nga gihan-ay na nila ang dokumento aron masang-at na ang kasong murder batok sa suspetsado.
Sayo pa, gibutyag ni Libres nga ang biktima ug suspetsado nagkaaway kaniadto ug giingong nagbinaharay ang duha nga nisangpot sa pagpamusil.
“Mao nga time niagi kay nag-inom man na sulod sa Ermita mao to ilang giatngan”, matud ni Libres. Wala ma-recover sa kapolisan ang armas nga gigamit sa suspek sa pagpamusil tungod kay gilabay sa naulahi ngadto sa sapa.
Ang kapolisan padayon nga nagpahigayon og hot pursuit operation batok sa laing duha ka suspetsado. (BANAT NEWS)