CEBU, Philippines — Sa sunod tuig pa 2025 magsugod sa pagdawat sa P10,000 nga tinuig nga pinansiyal nga ayuda ang mga senior citizen sa Siyudad Mandaue.
Kini ang giklaro sa pagpasabot sa mga opisyal sa kahugpongan sa mga senior citizen sa Barangay Pagsabungan sa gipahigayon nilang binulan nga tigom.
Dugang nga gipasabot nga sa bulan sa Disyembre niining tuiga sa ikaduhang hugna nga pagpanghatag sa tinuig pinansiyal nga ayuda sa senior citizen ilang madawat ang P4,000 nga maoy katunga sa P8,000 nga pinansiyal nga ayuda ug gipun-an kini og P1,000 isip Christmas bonus nga ihatag sa kagamhanan sa siyudad hinungdan nga P5,000 unya ang ilang madawat.
Nasayran nga si Mayor Jonas Cortes maoy unang nagpahibalo sa pagdugang og P2,000 sa tinuig nga pinansiyal nga ayuda sa mga senior citizen sa dakbayan.
Si Konsehal Jimmy Lumapa, chairman sa committee on social services maoy nangamahan sa ordinansahon ug hingpit na kining giaprobahan sa mayoriyang sakop sa konseho sa kataposan nga pagtuki atol sa regular session nga ilang gihimo. — /BDB (BANAT NEWS)