CEBU, Philippines — Duha ka gipasanginlang mga tulisan ang nakalas sa dihang matud pa misukol sa mga polis nga nigukod kanila diha sa Purok 1, Barangay Anislag, Lungsod sa Corella, Probinsiya sa Bohol niadtong Sabado, Hunyo 1, 2024 pasado alas 9 sa gabii.
Ang mga nakalas mao sila si Jonas Amen, residente sa Ubujan District, Tagbilaran City ug si Ricky Gamo, nagpuyo sa Barangay Tagbuane, Lungsod sa Alburquerque.
Nasayran nga niadtong Hunyo 1, 2024, Sabado, alas 9:30 sa buntag ang grupo sa mga suspetsado gikatahong nanulis og matud pa usa ka tinun-an samtang naglakaw ang naulahi diha sa karsada sa Lungsod sa Sikatuna.
Ang mga operatiba sa Provincial Intelligence Unit sa Bohol Police Provincial Office uban ang kapulisan sa Sikatuna Police Station nagpahigayon og hot pursuit operation batok sa grupo sa giingong mga tulisan. Gisubay nila ang Lungod sa Balilihan, Cortes ug Corella sanglit ang maong lugar maoy gitan-aw sa kapulisan nga giagian sa mga suspetsado sa ilang pag-ikyas human mahimo ang krimen.
Samtang gasubay ang mga personnel sa PIU BPPO sa Provincial Road sa Purok 1, Barangay Anislag, Lungsod sa Corella, Bohol nakit-an nila ang tulo ka mga lalake nga sakay og motorsiklo nga pareho sa motorsiklo nga gihulagway sa biktima nga gisakyan sa mga nitulis kaniya sa Lungsod sa Sikatuna.
Dihang ang misensyas ang kapulisan sa motorsiklo nga gisakyanan sa tulo nga magpadaplin giingong nagpakusog na hinuon sila og padagan hinungdan nga nahitabo ang ginukdanay.
Dihang nakalayo og 300 metros ang mga suspetsado gikan sa dapit asa sila gipara giingong dali-dali nga nikanaog sa motorsiklo ang tulo ug gibiyaan ang motor daplin sa karsada.
Nanagan matud pa ang tulo sa kasagbutan ug duna kanila ang giingong nagpabuto sa ilang mga armas sa mga nigukod nga mga polis maong naigo ang usa sa mga polis.
Wala mohunong ang kapulisan sa paggukod sa mga suspetsado ug nibawos sab sila sa pagpabuto sa ilang armas.
Ang polis nga naigo sa pagpamusil sa lawas wala ra maunsa sanglit nagsul-ob man og bulletproof vest.
Atol sa sinukliay sa bala, naigo ang duha samtang laing kauban nga wala pa mailhi sa pagkutlo ning maong balita ang nakaikyas.
Gidala pa sa Governor Celestino Memorial Medical Center sa Tagbilaran City ang duha ka mga suspetsado apan gideklarar kining dead-on-arrival.
Nailhan ang mga duha ka mga suspetsado nga nakalas base sa records nila kaniadto nga pagpanglabni ug pagpangawat sa Tagbilaran City ug Panglao. Base sa intelligence gathering ug monitoring sa kapulisan ang tulo ka mga suspetsado mao sab ang mga suspek sa tulis sa usa ka gas station sa Lungsod sa Dauis niadtong Mayo 30, pagtulis sab sa convenience store sa Tagbilaran City niadtong Mayo 23 ug laing tulis sa gas station sa Lungsod sa Maribojoc niadtong Mayo 22. Na-recover sa kapulisan ang mga ebidensiya sama sa duha ka .45 kalibre nga armas nga dunay mga bala, usa ka color red ug black nga motorsiklo. — /IBM (BANAT NEWS)