Beneficiaries sa livelihood program nakadawat og tag P15,000

CEBU, Philippines — Niabot ngadto sa 666 ka beneficiaries gikan sa nagkadaiyang dapit sa Sugbo ang nakadawat og cash assistance pinaagi sa Sustainable Livelihood Program diin ang kalihokan gipahigayon diha sa Subangdaku Multipurpose Gymnasium, Dakbayan sa Mandaue kagahapon.

Ang maong kalihokan gipangulohan nila ni Kongresista Erwin Tulfo, ACT-CIS Partylist ug Mayor Jonas Cortes.

Nasayran nga ang beneficiaries naggikan sa mga dakbayan sa Talisay, Mandaue, Lapu-Lapu, Naga, Carcar ug Toledo ug mga lungsod sa Samboan, Balamban, Medellin, San Remegio, Liloan ug uban pa.

Matag usa sa beneficiaries nakadawat og tag P15 mil nga seed money nga maoy gamiton nila sa ilang gipili nga panginabuhian.

Si Tulfo nagkanayon nga dili lang kini ang kataposan nga pag-apod-apod nila og ayuda sa Sugbo tungod kay madugangan pa kini sa umaabot nga adlaw ilabi na maoy kagustohan ni Presidente Ferdinand “Bongbong” Marcos, Jr. nga walay mabiyaan ug tanan mag-uban sa kalamboan. Giawhag ni Tulfo ang beneficiaries nga gamiton nila sa negosyo ug palambuon ang nadawat nila nga pinansiyal nga ayudad alang sa ilang pamilya ug dili gamiton sa bisan unsa nga bisyo sama sa sugal.

Ang maong ayuda i-monitor kini sa mga kadagkoan sa DSWD-7 nga molanat ug lima ka tuig ug posibleng mapun-an pa kini kong makita nga maayo ang pagpadagan sa ilang panginabuhian.

Ang direktor sa DSWD-7 Shalaine Marie Lucero niawhag usab sa beneficiaries nga  ampingan ang kwarta nga ilang gihuptan ug palambuon kini nga makab-ot nila ang mga damgo alang sa mga plano ug proyekto.

Sa laing bahin, gihangop  sa mga senior citizen sa Siyudad sa Mandaue ang hingpit na nga pag-usbaw sa ilang tinuig nga pinansiyal nga ayuda nga gihatag sa kagamhanan sa siyudad.

Si Konsehal Jimmy Lumapas, chairman sa committee on social services ang nangamahan sa ordinansahon nga pag-usbaw og P2,000 sa pinansiyal nga ayuda sa senior citizen ug giaprobahan kini sa konseho sa siyudad.

Ang senior citizen sa siyudad makadawat na og P10,000 nga tinuig nga ayuda gikan sa P8,000 ug madawat nila ang P5,000 sa ikaduhang hugna sa pagpanghatag sa buwan sa Disyembre niining tuiga. (BANAT NEWS)