CEBU, Philippines — Nipagawas og pahimangno ang Department of Education mahitungod sa haom nga pagpahigayon og graduation rites sa mga eskwelahan aron malikayan nga mabastos ang ka solimne sa pagtapos sa mga tinun-an.
Taliwala sa mga nagkadaiyang paukyab sa pipila ka mga tunghaan atol sa graduation rites aron lang mag-viral sa social media gikinahanglan nga ipatigbabaw ang respeto sa seremoniya sa pagdawat sa diploma.
Giklaro ni DepEd-7 Director Salustiano Jimenez nga mamahimong adunay gamay’ng gimmick atol sa memorable event sa kinabuhi sa mga estudyante apan ipabilin ang pagkasolimne sa graduation ceremony.
Nipahimangno si Jimenez sa mga tunghaan nga himuong simple ang moving-up ug graduation rites ug dili himuong mandatory ang pagsul-ob og toga ug labaw na ang venue nga igo lang ma-afford sa mga ginikanan sa tinun-an.
Ug dili himuon kining pagpanghulga sa mga tinun-an nga dili pirmahan ang clearance kon dili motuman.
Sa laing bahin, nag-school hopping si Talisay City Mayor Gerald Anthony “Samsam” Gullas, Jr. gikan niadtong adlaw’ng Miyerkules.
Kini human ang mga tunghaan sa siyudad nitapos na sa school year 2023-2024.
Kagahapon duha ka tunghaan ang gibisita ni Gullas aron sa pagtambong sa graduation.
Matud ni Gullas nga ang Talisay adunay 44 ka pampublikong tunghaan ug dili siya gusto nga dili makatunga sa kalihokan kong siya imbitahon. (BANAT NEWS)