P41M shabu nasakmit

CEBU, Philippines — Mga kinilo nga gituohang shabu ang nasakmit atol sa managlahing  buybust operation sa kapolisan sa Police Regional Office 7 didto sa Sitio Mustang Upper, Brgy. Pusok, Lapu-Lapu City ug F. Vestil St., Brgy. Mambaling, Cebu City Miyerkules sa gabii.

Unang nadakpan sa kapolisan sa City Intelligence Unit ug City Drug Enforcement Unit - Lapu-Lapu  City Police Office pasado alas 7:06 sa miaging gabii diha sa Sitio Mustang Barangay Pusok si Alma Bolra Vega, 27, residente sa Villagonzalo II,  Brgy. Tejero, Siyudad sa Sugbo.

Si Vega nakuhaan og mga nagkadaiyang putos sa gituohang shabu nga motimbang og 5,100 grams o kapin lima ka kilong shabu nga nagkantidad dul-an sa P35 milyones nga gisulod sa luggage.

Si Police Lieutenant Christian Torres, tigpamaba  sa LCPO  miingon nga gawas  sa shabu, nakuha sab ang cellular phone gikan sa suspek nga ilahang susihon aron matan-aw kun kinsa pa iyang mga kaubanan sa ilegal nga drugas.

Dugang pa ni Torres sa kapin sa usa  ka bulan nila nga pagpaniid sa suspek ilang nasuta nga motagak  kini og  lima ngadto sa unom ka kilong shabu Lapu-Lapu City matag semana .

Gikatahong ang kontak sa suspek naa sa prisohan didto sa Luzon.  Sa laing operasyon, ang mga sakop sab sa Regional Police Drug Enforcement Unit-7 nakasakmit usab og kapin sa usa ka kilong shabu nga nagkantidad og dul-an sa P7 milyones.

Nahitabo ang operation sa samang gabii diha sa  F. Vestil St., Brgy. Mambaling Syudad sa Sugbo nga niresulta sa pagkasikop kang Joel Jomao-as Matig-a alyas "Tawi" ,54, residente sa Sitio Tugas Brgy. Mambaling sa nahisgutang siyudad .

Matud pa sa kapolisan, tulo ka bulan nilang gisundan si Matig-a human sila nakadawat og impormasyong nalambigit kini sa ilegal nga drugas ug makabaligya og usa ka kilo matag semana.

Giingong aduna kini kakunsabong piniriso nga natanggong sa  usa ka prisohan nga maoy matud pa mokontak sa ilang suppliers..

Sa kinatibuk-an mokabat og dul-an sa 41 milyones ka pesos ang kantidad sa drugas nga nasakmit sa maong duha ka operasyon.

Ang mga dinakpan gibalhog na sa prisohan mag atubang og kasong kalapasan sa Sec 5 Sec 11 Article 2 RA 9165. (BANAT NEWS)