Dumptruck nalahos sa sapa, duha naangol  

CEBU, Philippines — Duha ang angol dihang ang dump truck nga nagkarga og anapog nalahos sa sapa diha sa Sitio Lower Kawayan, Barangay Sambag 2, siyudad sa Sugbo alas-10 sa gabii adlaw’ng Miyerkules.

Ang mga naangol mao ang driver sa truck nga si Melvin Acosta Ramas, 49, nagpuyo sa Barangay Dumlog, Talisay City ug ang helper niini nga si Christian Latore, 23 anyos, taga Barangay Pooc Ranger, Talisay City. Sa imbestigasyon sa Traffic Enforcement Unit(TEU) sa Cebu City Police Office ang driver sa dump truck nagpaatras aron unta iyabo ang kargang anapog.

Ang iyahang helper maoy nagsenyas sa driver sa pagpaatras sa truck apan wala damha nga ang riprap nga gitukod sa maong dapit kalit nahugno nga maoy hinungdan nga ang helper natagak ug ang dump truck natikalbong paubos sa sapa. Gumikan sa maong hitabo ang driver ug ang helper nakaangkon og minor injuries.

Usa ka tulo ka andana nga balay ni Edmedio Lavistre Sr., ang nasaghiran gayud sa natagak nga sakyanan gani naigo ang haligi niini ug nabuslot usab ang parte sa balay.

Nabalaka sila nga natandog ang pundasyon sa balay ug naapektahan ang kalig-on niini.  Buot niyang pabayron og danyos ang mga hingtungdan.

Nanghinaut ang mga molopyo sa dapit nga mahaw-as na ang truck ug mahawanan ang sapa aron dili moawas ilabi na karon nga ting-ulan na.

Ang representante sa tag-iya sa luna nga gipatrabaho nga si William Chong, nitug-an nga giuna nila sa pagsiguro ang kahimtang sa driver ug pahinante.

Gipasalig nila ni Chong, nga aksyonan gilayon nila ang maong problema aron dili na kini makamugna pa og kakuyaw sa mga tawo nga anaa nanimuyo sa maong dapit ug ilaha usab abagahon ang galastohon sa kadaut ngadto sa balay nga naigo sa maong sakyanan. (BANAT NEWS)