CEBU, Philippines — Nikabat ngadto sa 1,000 ka gramong shabu nga nikantidad tanan ngadto sa P6.8 milyones ang nasakmit atol sa buy-bust operation nga gipahigayon sa kapolisan niadtong Martes sa gabii didto sa Purok 4, Barangay Lourdes, Lungsod sa Panglao, Probinsiya sa Bohol.
Ang suspetsado giilang lang sa kapolisan nga si alyas “Bert”, 39-anyos, residente sa Purok 6, Barangay Manga, Tagbilaran City, Probinsiya sa Bohol ug giingong bodegero sa ilegal nga drugas.
Nasayran nga ang suspetsado nadakpan na kini niadtong tuig 2022 gumikan gihapon sa pagkalambigit niini sa ilegal nga drugas ug nakagawas human nipaubos sa plea bargaining apan nibalik gihapon kini sa iyang ilegal nga kalihokan.
Gikataho nga ang suspetsado maka-dispose kini og dinagko nga gramo sa ilegal nga drugas. Dili lang sa Lungsod sa Panglao ang area of operation niini apil ang mga silingan nga mga dapit.
Kasong kalapasan sa Section 5 ug 11, Article II sa Akta Republik Act 9165 kun “Comprehensive Dangerous Drugs Act of 2002” ang ipasaka batok sa suspetsado.
Sa laing bahin, niabot sa 205 ka tawo ang nasikop sa Lapu-Lapu City Police Office (LCPO) kinsa nakahimo og lain-laing kalapasan atol sa usa ka adlaw nga Simultaneous Anti-Criminality Law Enforcement Operation (SACLEO) nga ilang gipahigayon sugod sa alas 12:00 sa tungang gabii sa Mayo 28 hangtud sa tungang gabii sa Mayo 29, 2024.
Si Police Colonel Christian Torres, tigpamaba sa LCPO nagkanayon nga naglakip sa ilang nadakpan ang upat ka nalambigit sa ilegal nga dugas sa gipahigayon nilang upat ka mga anti-ilegal drug operation, 11 ka wanted person, 29 ka tawo nga naaktohan sa kapolisan nga nag-inom og ilimnong mkahubog sa publikong lugar, 161 ka tawo kinsa nanabako sa publikong lugar ug 34 ka menor de edad nga nakalapas sa curfew ang na-rescue. (BANAT NEWS)