Mga layko supak sa Divorce Bill

CEBU, Philippines — Wala mawagtangi og paglaum ang mga hugpong sa Sugbo nga supak sa diborsyo nga mabalit-ad pa ang desisyon sa kongreso pagpalabang sa Absolute Divorce Bill.

Dismayado ang hugpong sa mga layko nga nipatigbabaw sa ubos balay balaoranan ang mga nipabor sa deborsyo sa boto diin adunay 131 ang niuyon, 109 ang nisupak ug 20 ni-abstain.

Gikasubo usab sa grupo ang pagpabor sa duha ka magbabalaod sa Sugbo nga nibotar pabor sa diborsyo.

Ug tungod kay gamay ra ang labaw sa mga nipabor sa Divorce Bill gilaoman nila ni Dr. Rene Josef Bullecer sa Human Life International-Philippines nga mahatagan og kahigayonan nga mausab ang resulta human unya sa break sa kamara.

Ug kong ugaling mapasar sa Senado ang Divorce Bill ang grupo giingong modangop kini ngadto sa korte.

Gibarugan sa grupo nga adunay daghang pamaagi nga masalbar ang kasagrado sa kaminyoon pinaagi sa pagpangita og tabang sama sa marriage counseling ug uban pa.

Ang chairman sa Commission on the Laity sa Archdiocese of Cebu Fe Mantuhac-Barino nipagawas og pamahayag diin gipadayag niya nga supak sila nga mga layko sa diborsyo sa nasud.

“Ang kaminyoon usa ka sagrado nga pakigsaad tali sa lalaki ug babaye nga gitukod sa Dios. Kini usa ka sakramento, usa ka makita nga timaan sa grasya sa Dios”, padayag ni Barino.

Si Barino nagkanayon nga diha sa mga ebanghilyo, si Hesus tin-aw nga nagtudlo batok sa diborsiyo ug gitumbok niini ang Mateo 19:6 nga si Hesus nag-ingon, "Busa dili na sila duha, kondili usa ka unod. Busa, ang gihiusa sa Dios, walay tawo nga kinahanglang magbulag".

Ang simbahang Katoliko nagtuo sa pagtuboy sa kaayohan ug kalig-on sa unit sa pamilya nga gikonsidera nga kinahanglanon alang sa himsog nga paglambo sa mga bata.

Nanawagan usab si Barino sa mga sakop sa Senado nga dili mapasar ang divorce bill sa ilang han-ay ug kini hugot nilang supakon. (BANAT NEWS)