CEBU, Philippines — Misaka og gidaghanon sa mga pasahero sa Mactan Cebu International Airport basi kini sa passenger traffic sa maog tugpahanan sa miaging buwan kun itandi sa samang buwan sa miaging tuig.
Matud pa ang domestic ug international nga mga pasahero nabantayan nga parehong misaka niadtong buwan sa Abril nga miabot og 926,025 itandi sa 787,781 sa samang buwan sa tuig 2023.
Matud pa ang 696,698 ug 229,327 mga international passengers. Matud pa kun itandi kini sa miaging tuig, nisaka og 18% passenger growth ug 10% seat capacity growth karong tuiga.
Misaka sab og 14% ang air traffic gikan sa 20 ka mga airlines ( lima ang lokal ug 15 ang foreign airliners) padung sa 40 ka mga destinasyon.
Natuo ang MCIA nga mas mosaka pa kini sa moabot nga mga buwan sanglit nakapanukad naman og hunat ug dunay mga bag-ong gibuksang direktang flights gikan sa Cebu padung sa Shanghai ug Guangzhou pinaagi sa China Southern Airlines.
Ang direct flights gikan sa Cebu padung sa Shanghai magsugod karong Hulyo 2 ug ang sa Gunagzhou Hulyo 13.
Samtang sa lokal nga mga flights gibuksan niadtong Mayo 1, sa Sunlight Air ang ilang Cebu – Boracay flights. Kaduha kada semana nila kining buhaton.
Ang MCIA bag-ohay lang nahimong labing unang tugpahanan sa Pilipinas nga gipasidunggan og Platinum Award sa Green Airports Recognition 2024 sa Airports Council International (ACI) atol sa seremonya didto sa Riyadh, Saudi Arabia.
Ang MCIA maoy usa sa 12 ka mga exceptional airports sa tibuok Asya-Pasipiko ug Middle East tungod sa ilang sustainability efforts.
Matud pa nalupigan sa MCIA ubos sa 8-15 million passenger airport category ang King Fahd International Airport (gold) sa Saudi Arabia ug Chubu Centrair International Airport (silver) sa Japan. --- Gikan sa The Freeman/IB