Mga museyo sa kabilin sa Sugbu gi-vandal

CEBU, Philippines — Tulo ka mga giilang heritage sites o mga dapit sa kabilin sa kultura, tradisyon ug relihiyon sa mga Sugbuanon ang nabiktima sa vandalism gikan sa wala pa mailhing malapason.

Apan nasayran, nga ang naghimo niini usa ra ka tawo base sa pagkasuwat niini sa mga pulong “Black Rainbow” gamit ang usa ka itom nga pentel pen.

Ang gipang vandal mao ang bungbong sa Basilica Minore del Santo Niño diha sa gawas nga bahin sa Aula Hall ug Sintra board wall sa hagdanan sa Cebu Chinese Heritage Museum.

Samtang ang karaang Jesuit House sa Pari-an, gisuwatan sab ang usa sa mga karaang gamit didto. Way CCTV footage nga nakakuha sa paghimo niini.

Si Padre Ion Miranda, friar sa Basilica Minore del Santo Niño natuo nga nakakita og panahon ang malapason paghimo sa iyang dautang binuhatan atol kini nga nalingaw ang tanan sa pasundayag og sayaw samtang nagsulod-gawas sa Aula Hall atol sa pagpahigayon sa Gabii sa Kabilin niadtong nakalabay’ng semana Mayo 10,2024.

Samtang si Ma. Elena Lim, Executive Director Cebu Chinese Heritage Museum nagtuo sab nga nahitabo kini sa sayong bahin anang Gabii sa Kabilin sa dihang nagsugod na og abo tang mga tawo diha sa museyo.

Sa Facebook page sa Sugbo Chinese Heritage Museum  kini mipasabot nga ang tanang bisita gihatagan og kagawasan nga makasud ug makatan-aw sa tanang naa makita sa sud apan dili ang pagguba niini.

“However, that freedom is limited when it causes damage and harm to another's property. This is where the term respect is called for - an understanding that we do not exist in the world solely on our own but as part of the community. This is a reminder that when one visits a museum and decides to go beyond the line of respect and damages its property, whether by vandalism or another, the damage is done not only to that part of the museum or to the museum itself but to all that made an effort to preserve heritage and culture,” matud pa sa ilang pamahayag.

Kaning mga gamit nga makita sa mga museyo gikan pa sa karaang panahon nga adunay tagsa-tagsa ka estorya ug napatik na sa kasaysayan apan dili na mahimonng balikon kondili kutob nalang sa pagpahinumdom sa tanan bahin niini pinaagi sa paglusad anang Gabii sa Kabilin.

 “Yet, last May 10, 2024 during the Gabii Sa Kabilin, The Jesuit House Museum was a victim of vandalism, which for us marred the recent success of the event,” matud pa sa post sa Facebook Page sa Jesuit House.

Ang pag-post niini pinaagi sa Facebook gihimo aron mapahibalo sa tanan ang kamahinungdanon sa tanang mga butang nga makita sa sud sa mga museyo ug aron sab mailhan kun si kinsa ang naghimo niini aron sila edukahon kun giunsa kini pag-amping ug pagtip-ig sa mga tawo sa museyo para makakita pa ang ubang mosunod nga mga henerasyon.

Giawhag ang publiko sa paghatag og impormasyon kun dunay nakaila kun si kinsa ang tawong mahilig og vandal nga Black Rainbow.— IBM BANAT NEWS