Budget sa Palaro adunay kickback?

CEBU, Philippines — Gihimakak sa chairman sa committee of sports sa Konseho sa Dakbayan sa Sugbo Konsehal Donaldo Hontiveros ang mga alegasyon sa "kickback" sa Palarong Pambansa 2024 hosting budget.

Apan matud niini nga uyon siya sa mga aksyon ni Acting Mayor Raymond Alvin Garcia nga temporaryong suspensohon ang mga procurement order.

Usa ka adlaw human ang procurement suspension order gipirmahan nga gianunsiyo ni Garcia, giklaro ni Hontiveros ang mga kabalaka sa budget sa Palaro hosting ilabi na sa gisulti sa usa ka social media personality nga si Jason Monteclar.

Sa iyang reaksiyon, si Cebu City Mayor Michael Rama kinsa ubos sa unom ka buwan nga preventive suspension nagkanayon nga iyang itugyan ang maong butang ngadto kang Hontiveros ug Cebu City Commission on Sports Chairman John Pages.

Sa pakighinabi kagahapon, giangkon ni Hontiveros nga dili makiangayon alang kanila nga mga konsehal sa dakbayan nga labayan sa maong mga pamahayag.

Sa video commentary nga gi-post sa iyang social media, si Monteclar nipasangil nga pipila sa mga konsehal adunay bahin sa listahan sa budget alang sa Palarong Pambansa hosting.

Bisan pa niini, si Hontiveros nagkanayon nga uyon siya sa aksyon ni Garcia nga temporaryong suspensuhon ang procurement orders sulod sa tulo ka adlaw ug matud niya nga si Garcia wala pa mapahibalo sa budget appropriations sa Palarong Pambansa hosting.

Matud usab ni Hontiveros nga nakigkita na siya kang Garcia human sa anunsiyo diin ilang gipasabot ang listahan sa mga procurement.

Lakip sa gipasabot ni Hontiveros mao ang P21 milyones nga budget appropriation alang sa portalet rentals.

Giklaro usab niya nga ang budget appropriation sa abang dili P21 milyones apan P18 milyones.

Giingong sa iyang video, gikwestiyon usab ni Monteclar ang P11 milyones nga budget appropriation alang sa mga tumbler.

Giklaro usab ni Hontiveros nga ang maong kantidad naglakip sa 12,000 ka tumblers ug 12,000 ka t-shirts diin apod-apod kini sa mga atleta ug technical officials.

“Unfair man kaayo ni, gi-scrutinized ni namo (budget list), nisunod mi by the book, ni advance mi’g PR, then na-award na, but kasabot mi sa gibuhat sa acting mayor mga based on the gisulti ni Jason Monteclar”, matud ni Hontiveros.

Bisan pa sa mga pasangil ni Monteclar, ang legal team ni Hontiveros nakahukom nga dili na sila mopasaka og mga reklamo.

Niadtong Pebrero 29, 2024, ang executive department sa Cebu City government nangayo og dugang P205 milyones nga budget alang sa pag-host sa Palarong Pambansa 2024. Labaw pa kini sa giaprobahan nga P200 milyones nga nalakip sa annual budget.

Sa pagsulat niining balita, gibutyag ni Hontiveros nga sa wala pa ang pagsuspenso sa procurement, aduna nay 80 ngadto sa 90 porsyento ang na-award o gitakda na sa bidding. BDB BANAT NEWS