CEBU, Philippines — Nakigtagbo si Mandaue City mayor Jonas Cortes sa mga ginikanan nga adunay anak nga nagbaton og kakulian sa panglawas kun Persons with Disability PWDs.
Tumong sa mayor sa maong pakigtigum mao aron masuta ang panginahanglan sa mga adunay kakulian sa panglawas.
Atol sa general assembly meeting nga gipatawag sa buhatan sa PWD's gihimo usab ang organisasyon kun kahugpongan sa mga ginikanan ug mga guardian.
Ang pangu sa Person with Disability Office PDAO nga si Dr. Michael Allan O. Pielago nihimo sa kahugpungan aron mapaminaw ang concerns sa mga ginikanan nga adunay anak nga PWDs ug makahatag og tukma nga tabang ang dakbayan sa Mandaue.
Mapasalamaton ang PWD sa Mandaue City sa administrasyon ni Mayor Jonas Cortes tungod kay matud pa nila sukad pa gayod kaniadto ilang nasinati ang serbisyo sa kagamhanan nga naghatag og pagtagad sa mga PWD.
Gawas sa presensya sa mga city councilors nga sila si Maline Cortes- Zafra ug Jen Del Mar nitambong usab ang mga supporters nga non-government organization sama sa Beyond Words Therapy Center, Juanito I. King Foundation, Campion ABA Inc.
Sa general assembly adunay mga libreng serbisyo sama sa libreng masahe, free haircut.
Aduna usay mga kalihukan nga makalingaw sama sa Sensory Booth, Clay ug Puzzle Booth, Lego ug Blocks Booth, Talent Booth, Mga Kotse, Dolls, Support Group Booth, Face Painting ug Tattoo Booth, Music Booth, ug Bible Booth. (BANAT NEWS)