CEBU, Philippines — Pipila sa mga sakop sa konseho sa Dakbayan sa Sugbo ang nikwestiyon sa pagbutang sa ngalan nga susama sa political party “BARUG” sa resolusyon nga aprobahan ang paghatag og P400 milyones nga financial assistance sa 80 ka barangay sa siyudad.
Kini maoy gipadangat ni Konsehal James Anthony Cuenco human sa diskusiyon kabahin sa paghatag og subsidy sa 80 ka barangay atol sa regular session niadtong Miyerkules.
“The financial subsidy to the barangays shall be used to fund only projects that are geared towards the realization of the platform of governance, BARUG CEBU CITY including the following areas of concern”, tipik sa resolusyon.
Nasayran nga ang Partido Barug, kasagarang nailhan nga BARUG, usa ka rehiyonal nga political party nga nakabase sa Cebu City kinsa si Mayor Michael Rama ang founding president niini.
Si Rama ang ubos karon sa unom ka buwan nga preventive suspension.
"I believe that the use of these funds should be devoid of any political color and so if I may that this memorandum be amended to delete those words that leaning towards a particular political party this being government funds”, sugyot ni Cuenco. Apan gipasabot ni Konsehal Jocelyn Pesquera, majority floor leader ug co-author sa maong resolusyon uban ni Konsehal Franklyn Ong nga ang BARUG mao ang acronym sa policy direction nga giaprobahan ubos sa Executive-Legislative Agenda (ELA) niadtong tuig 2022.
Iyang giklaro nga ang asosasyon sa termino nga BARUG dili politically-affiliates ug kong gusto sa konseho nga amendahan kini, ang ELA kinahanglan una nga amendahan.
Si Konsehal Nestor Archival, Sr., minority floor leader nagkanayon nga bisan unsa pa ang acronym wala nila kini nahibaw-i ug aduna kini katahap nga kini nagtumong sa political party. Subay niini, gipahibalo ni Ong ang konseho sa BARUG acronym nga nagpasabot nga ang litrang B alang sa “Better Business Environment and Employment Opportunities”; A alang sa “Adequate Water Supply”; R alang sa “Resettlement and Housing with the City Government”; ang U alng sa “Urban Upland Development” samtang ang G alang sa “Good Governance, Public Safety and Resiliency Including the Revision of the RPT”.
Si Archival nisugyot nga ang maong acronym isulat sa memorandum aron malikayan ang sayop nga pagsabot sa paggamit sa mga termino.
Gikwestiyon usab ni Cuenco ang asosasyon nga Singapore-like nga vision sa memorandum.
Samtang si Konsehal Rey Gealon nagkanayon nga walay pagdili sa paggamit sa maong “political party” sa usa ka resolusyon.
Matud ni Gealon nga ang argumento ni Archival makatarunganon nga dili magbutang og political color sa subsidy. — /BDB (BANAT NEWS)