Sobra sa 700 ka punoan sa kahoy gikabalak-ang maputol

CEBU, Philippines — Sobra sa 700 ka punoan sa kahoy ang gikabalak-ang maputol gumikan sa road widening project sa Kapitolyo sa Lungsod sa Poro, Isla sa Camotes.

Ang Santo Niño Parish Eastern Poblacion sa Lungsod sa Poro ang nagpasiugda og public hearig niadtong Abril 27, 2024 kabahin sa maong isyu sa ilang lugar.

Si Padre Joel Bonza, padre kura sa Santo Niño Parish uban sa SNPPC officers sa wala pa ang public hearing nagkanayon nga adbokasiya sa simbahan ang katungod sa environment inspired sa encyclical ni Pope Francis Laudato’s Si “ Care of Our Common Home”.

Gihangop nila si Gobernador Gwendolyn Garcia sa nahisgutang road widening project sa lungsod apan ang grupo nipadayag sa mga punto nga ikonsiderar base sa ilang public hearing.

Base sa taho sa official news network sa Kapitolyo niadtong Marso 2022 nga ang nahisgutang proyekto maoy usa sa mga dako nga infrastructure project sa Kapitolyo niadtong panahona.

Ang third phase niini nikabat ngadto sa P237,885,000 diin aduna kini gitas-on nga 13.43 kilometers nga motadlas sa Barangay Mercedes, DaanPaz, Esperanza, Adela ug San Jose ngadto sa boundary sa silingang lungsod sa Tudela.

Atol sa gipahigayong press conference kagahapon ang Sacred Heart Center nagkanayon nga angayang hatagan og konsiderasyon ang importansiya sa mga punoan sa kahoy niining nagkagrabe nga sitwasyon sa climate change.

Matud ni Bonanza nga lakip sa mga kahoy nga gimarkahan na nga putlon mao ang 60 ngadto sa 70-anyos na ang pangedaron uban ang mga century-old Acacia, Lomboy ug Bangcal. — The Freeman