CEBU, Philippines — Patay ang usa ka 4-anyos nga batang babaye human kini naigo sa sakyanan nga L300 van diha sa Barangay Papan, Lungsod sa Sibonga, pasado alas-3 sa hapon sa Mayo 8, 2024.
Ang biktima nga 4 anyos residente sa Barangay Basak sakop gihapon sa maong lungsod gidala sa Deiparine Community Hospital ug gitabang pa sa doktor apan nakabsan gyud kini sa kinibuhi.
Ang driver sa Mitsubishi L300 Van mao si Joel Camoro Regodon, 42 anyos, residente sa Barangay Valladolid, Dakbayan sa Carcar.
Gikustodiya sa Sibonga Police Station ang driver ug posible kining mag-atubang og kasong reckless imprudence resulting in homicide.
Base sa imbestigasyon sa Sibonga Police Station ang inahan sa bata giingong nalipat. Uban sa biktima ang iyahan ug mga ig-agaw nga nagduwa-duwa og dakpanay apan naabot kini og dagan sa karsada.
Uwahi na nakabantay ang L 300 sa pagbutho sa bata diha sa dalan hinungdan nga nabanggaan kini ug napasok sa ilawom sa maong sakyanan nga nakaingon sa grabeng kadaot sa ulo ug lawas niini nga gituohang nakaingon sa iyang kamatayon. (BANAT NEWS)