Hingtungdan nga ahensya ipatawag sa konseho nonot sa suliran sa basura

CEBU, Philippines — Giaprobahan sa Cebu City Council ang resolusyon nga nanawagan sa mga hingtungdan nga ahensya alang sa usa ka executive session aron masusi ang kakuwang sa permanent Material Recovery Facility (MRF) sa siyudad nga mao unta ang motubag sa problema sa basura.

Atol sa regular session niadtong Miyerkules si Cebu City Councilor Philip Zafra mipadangat sa iyang privilege speech sa konseho ug milakbit kabahin sa pagsaka na usab sa paggamit og single-use plastic.

Subay niini iyang gisang-at ang resolusyon nga nag-awhag sa executive session ug nihangyo nga ipatawag ang DENR-EMB isip lead agency aron masusi ang roll-out implementation sa Extended Producer Responsibility Act of 2022.

Gawas niini nihangyo usab siya sa pagtambong sa officer-in-charged sa CCENRO ug sa Solid Waste Management Board sa maong sesyon aron masuta ang mga suliran ug babag sa katukoran sa permanent Material Recovery Facility.

Giawhag niini ang DepEd ug CHED nga mo-adopt sa gitawag og “sustainable innovative programs” uban sa TESDA, DMDP o sa ubang training institution kabahin sa waste reduction, recovery or recycling diha sa mga eskwelahan. Suma pa ni Zafra, nga kining maong lakang angayan nga himoon human masuta sa mga gihimong quarterly clean-up nga daghan ang mga plastic nga basura ang makuha nga maoy hinungdan sa pagbara sa mga drainage system ug nakahatag usab og kahugaw sa mga coastal areas ug kasapaan.

Atol sa 15th Cebu Citywide quarterly clean-up drive nga gipahigayon niadtong March 18, 2024, mokabat sa 87 tons sa basura ang nakolekta.

“Now while this may be lower than the 97 tons collected in 2023 and the 101 tons of garbage collected in 2022, still the question that comes to mind Mr. Chairman is whether we are proactively on the right track towards the goal of minimizing our garbage collection, especially the perennial problem of plastic waste,” suma pa ni Zafra. —The Freeman