CEBU, Philippines — Mahibalik na unya ang mga pulpit panel sa simbahan sa Boljoon human miuyon ang board of trustees sa National Museum of the Philippines sa pag-uli sa maong butang.
Atol sa ilang regular meeting sa kaulohan niadtong Miyerkules ang board miaprobar sa usa ka hugpong sa rekomendasyon sa tumong nga ibalik ang mga panel sa Archdiocesan Shrine of Patrocinio de Maria Santisima, Boljoon.
Kini ubos sa pipila ka mga termino nga gilaraw nga mahimong bahin sa komprehensibo nga kasabotan tali sa NMP ug Archdiocese of Cebu sa pagsuporta sa Boljoon Church Complex isip National Cultural Treasure ug Candidate for Unesco World Heritage Inscription.
Gimanduan usab sa Board ang Director-General nga sugdan dayon ang diskusyon sa Archdiocese of Cebu bahin sa maong butang.
Ang pangu sa Cebu Archdiocesan Commission for the Cultural Heritage of the Church ug Director, Archdiocesan Museum of Cebu Fr. Brian Brigoli, nibutyag nga wala pa silay nadawat nga communication bahin sa pag-uli sa pulpit panel.
Sumala pa ni Brigoli, positibo kaayo sila sa gihimo sa NMP ug ila kining gihangop.
“Pasalamat ni og dako nga nadawat nato ang official statement sa National Museum nga ilang ibalik ang pulpit panels sa Boljoon and yet nagpaabot pa mi sa official nga communication sa National Museum,” suma ni Brigoli.
Si Brigoli, nibutyag nga kung mahiuli ang pulpit panel aduna gayud seremonyas nga ipahigayon.
Samtang si Boljoon Mayor Jojie Derama nibutyag nga malipayon siya nga nakadungog nga ang pulpit panels sa ilang parokya ibalik na sa National Museum of the Philippines. “malipayon ko nga mabalik na gyud ang pulpit panels nga dugay na nga gikawat sa Boljoon sa iyang rightful place. Malipayon gyud kaayo mi kay daghan mi nag fight nga mabalik na”.
Hinuoon ang mayor miingon nga wa pa siya masayod kun kanus-a gyud ang eksaktong date sa pag-uli sa maong pulpit panels. (BANAT NEWS)