Ex-convict gipusil patay, patay’ng lawas nailhan na

CEBU, Philippines — Patay ang usa ka ex-convict human kini pusila sa wala mailhing mga mamumuno samtang gasakay sa iyang e-bike diha Sitio Tagunol, Barangay Cogon Pardo, Siyudad sa Sugbo niadtong Martes gabii.

Ang biktima mao si Jemar Pepino Cañete, 22-anyos, residente sa Sitio Kolo, Barangay Inayawan niining siyudad.

Base sa imbestigasyon sa Inayawan Police Station nga ang biktima nagbiyahe sakay sa e-bike niini diin tulo ka tawo nga sakay og motor ang kalit namusil ngadto sa biktima.

Ang biktima nakaangkon kini og mga samad pinusilan sa lawas nga hinungdan sa kamatayon niini.

Sigon ni Major Jiceree Basitao, hepe sa Inayawan Police Station nga aduna na sila'y persons of interest sa maong krimen.     

Usa sa nakita nilang anggulo sa maong pagpamusil ang kalambigitan sa ilegal nga drugas.

Sa laing bahin, nailhan na sa kapolisan sa Badian Police Station ang patay'ng lawas sa lalaki nga gisulod og sako ug nakit-an diha sa pangpang sa Barangay Santicon, Lungsod sa Badian niadtong Martes sa buntag.

Base sa report sa Badian Police Station nga ang kapitan sa Barangay Bunga, Dakbayan sa Toledo nga si Leonardo Villahermosa Oralde, 59-anyos nianha sa ilang buhatan kagahapon sa kadlawon.

Ug gikuyogan kini sa mga police personnel sa Badian Police Station diha sa Ely Sacred Heart Funeral Homes nga nahimutang sa Barangay Palanas, Lungsod sa Ronda.

Giila sa kapitan ang patay'ng lawas nga nakit-an nga iyahang pag-umangkon nga si Vanesh Joseph Oralde, 21-anyos taga Barangay Bunga, Dakbayan sa Toledo.

Nasayran nga niadtong Mayo 5,2024 kataposang nakit-an sa mga kabanay ang biktima.

Si Police Colonel Percival Zorilla, provincial director sa Cebu Police Provincial Office (CPPO) nimando sa Badian Police Station sa pagsulbad sa labing dali nga panahon sa maong kaso.

Nihangyo ang CPPO sa publiko ilabi na kadtong adunay kasayoran sa insidente nga makig-alayon kanila. (BANAT NEWS)