Namuyo sa Estero de Parian gihatagan og 72 oras

CEBU, Philippines — Human napadalhi og final notice sa kagamhanan sa Dakbayan sa Sugbo ang mga establisamento ug illegal settlers nga nagpuyo diha sa three meter easement sa Estero de Parian laing establisamento ang gikatakdang i-demolish karong adlawa.

Base sa listahan sa Task Force Gubat sa Baha nga adunay 91 ka pamilya diha sa Estero de Parian nga sakop sa mga barangay sa Santo Niño, Tinago ug San Roque.

Mayoriya kanila ang nakadawat og final notices diin usa ang nagdumili sa pagdawat sa maong notisya.

Nasayran nga aduna pay laing 20 ang wala makadawat og notisya tungod kay walay tawo sa mga panimalay niini dihang gi-serve ang maong notisya.

Ang maong mga pamilya gihatagan og 72 oras nga boluntaryong mohawan sa ilang mga istraktura nga gitukod diha sa three meter easement sa sapa.

Gitutokan og una sa Task Force Gubat sa Baha ang Estero de Parian tungod kay ang maong lugar maoy kasagarang maapektohan sa baha.

Sayo pa, ang TF-Gubat sa Baha nipadala og final notices ngadto sa 30 ka establisamento ingon man sa duha ka buhatan sa gobiyerno nga anaa diha sa Estero de Parian.

Ang mayoriya sa mga tigdumala sa mga establisamento ang nikooperar kini ug nipadayag sa boluntaryong pag-demolish sa ilang mga edipisyo.

Ang TF-Gubat sa Baha naghuwat lang kini sa survey report gikan sa private surveyor sa maong mga pribadong establisamento aron sa pag-finalize sa redesign sa estraktura sa ilang building ug tang-tangnon ang parte nga anaa nahimutang sa no-build zone.

Si Aderson Comar, Estero de Parian river commander nagkanayon nga usa ka abandonadong apartment ang gikatakdang i-demolish nila karong adlawa.cMatud ni Comar nga ang mga personnel sa siyudad nga gipangulohan sa iyang departamento ug ang PROBE motabang aron mapaspasan ang clearing operation sa nahisgutang istraktura. Ang ubang mga establisamento pwedeng mangayo og tabang sa siyudad sa paghawan sa ilang istraktura kong kuwangan kini sa manpower ug resources. —/BD (BANAT NEWS)