Wa mo-remit, gipatay sud sa balay

CEBU, Philippines — Patay ang usa ka lalake nga giingong wala mobayad sa gikuha niya nga ilegal nga drugas human kini gipusil kagahapon sa tungang gabii diha sa Sitio Camansi, Barangay Mambaling, Siyudad sa Sugbo.

Ang biktima mao si Edmundo Delos Reyes Dayao, 35, nagpuyo sa naasoy nga lugar.

Sigon ni Police Lieutenant Colonel Janette Rafter, Deputy City Director for Administration sa Cebu City Police Office ang biktima nakagawas sa kasong kalambigitan sa illegal nga drugas human nakapiyansa niadtong Disyembre 2022.

Taga Talisay City matud pa ang biktima apan nibalhin sila og puyo sa Barangay Mambaling.

Base imbestigasyon ang biktima naa ra sa panimalay nagbantay sa mga anak niini sa dihang nahitabo ang pagpamusil.

Niabot matud ang mga mamumuno nga nagmotorsiklo ug nidiretso og sud sa iyang balay ug gipusil ang biktima sa nagkadaiyang parte sa iyang lawas nga maoy rason sa iyang kamatayon.

Daling misibat ang mga mamumuno apan nailhan na sila sa kapulisan sa Mambaling Police Station.

“As of now, anaa na kita’y suspetsado nga nailhan pud sa uban nga tawo, he is also from Talisay, kaning atong suspetsado na file-an pud ni og case for murder last January 2023,” sigon ni Rafter.

Kalambigitan sa ilegal nga drugas ang gitutokang motibo sa maong krimen sanglit gikataho nga ang biktima nakadispalko og dako nga kwarta sa halin sa ilegal nga drugas hinungdan nga kini gigukod sa mga mamumuno.

Na-recover sa crime scene ang duha ka kabhang sa bala sa kalibre .45 nga armas ug usa ka paketeng gituohang shabu. (BANAT NEWS)