CEBU, Philippines — Patay ang usa ka construction worker nga naghuramintado human kini naunay sa iyahang armas ug nakaangol og laing tulo ka tawo niadtong Domingo sa gabii diha sa Barangay Tupas, Lungsod sa Ronda.
Ang namatay mao si Zaldy Bailoces, 33-anyos, minyo, lumad nga taga Lungsod sa Bindoy, Negros Oriental.
Si Bailoces daling gidala ngadto sa Rural Health Center sa Lungsod sa Ronda human kini nakaangkon og samad pinusilan sa iyang dughan apan nakabsan kini sa kinabuhi diha sa maong tambalanan.
Samtang ang 20-anyos nga construction worker nga lumad nga taga Manhuyod, Probinsiya sa Negros Oriental nakaangkon kini og samad dinunggaban sa tuong kamot human kini giingong gidunggab ni Bailoces.
Laing naangol ang 32-anyos nga construction worker usab, nga lumad nga taga Bindoy kinsa nakaangkon og samad dinunggaban sa likod ug ang laing biktima mao ang 72-anyos nga residente sa Barangay Tupas ang nakaangkon usab og samad dinunggaban sa kamot ug tiyan.
Base sa imbestigasyon sa Ronda Police Station ang suspek nanghuwam og P1,000 niadtong Domingo kay mouli unta kini sa Negros. Giingong depressed ang biktima apan wala mahibaw-i unsay problema niini tungod kay dili kini mo estorya.
Si Bailoces gipasakay og bus sa iyang mga kauban aron makapauli , apan samtang namahuway na sila sa bunk house sa ilang gitrabahuan niabot og kalit si Bailoces ug gidunggab ang duha. Dayon niadto sa balay sa 72-aanyos nga biktima ug iyaha sab kining gidunggab. Giingong nakig-inilogay ang 72-anyos ug si Bailoces sa revolver ug nibuto kini ug didto niigo ang bala sa dughan niini.
Mitahan sa iyang kaugalingon ngadto sa kapolisan sa lungsod ang 72-anyos.
Ang kapolisan mopahigayon og dugang imbestigasyon pagsuta sa hinungdan sa paghuramintado ni Bailoces. (BANAT NEWS)