Solar power plant tukoron sa dumanjug ug Toledo

CEBU, Philippines — Human sa Daanbantayan, ang lungsod sa Dumanjug ug dakbayan sa Toledo ang giplanohan nga tukoran og solar power plants sa usa ka kompaniya.

Ang enery player nga Acciona Energia mipadangat sa plano niini nga magtukod og laing solar power plant sa nahisgotan mga lugar sa Probinsya sa Sugbo.

Ang plano mao ang pagtukod og 155.4 megawatts (MW) power plant sa Barangay Calaboon ug Camboang sa Dumanjug ug mas dako dako nga mga solar power plant sa Brgy. Canlumampao, Toledo City nga moabot sa 314.5 MW.

Si Mayor Marjorie Perales sa Toledo ug Mayor Gungun Gica sa Dumanjug parehong nihangop sa maong proposal sa Acciona diin nisaad ang duha ka mayor nga motabang sa kompaniya sa proseso sa pakigpulong sa mga tag-iya sa luna nga maapektohan sa maong proyekto.

Ang Acciona Energia gikatakda nga mopresentar sa maong proposal ngadto sa legislative body sa Toledo ug Dumanjug subay sa proseso sa paghatag og authorization.

Si Cebu governor Gwendolyn Garcia nagkanayon nga ang Kapitolyo motabang sab sa pakigpulong sa tag-iya sa luna alang sa hapsay nga dagan sa pagpatuman sa maong proyekto.

Ang business development director for Southeast Asia sa Acciona nga si Ignacio Domecq uban si Fermin Alvarez, general manager sa Freya Renewables, ang subsidiary sa Acciona Energia ug Ruben Camba, presidente sa Spanish Chamber of Commerce sa Pilipinas kinsa mao usab ang director sa Acciona sa Infrastructure sa Southeast Asia ang nakigtigom sa gobernador kalabot sa maong plano. — /MEL (BANAT NEWS)