7, 338 scholars sa Liloan nakadawat na sa ilang scholarship grant
CEBU, Philippines — Moabot sa 7, 338 ka mga scholars sa lungsod sa Liloan, amihanang Sugbo ang nakadawat na sa ilang scholarship grant alang sa mga nagtungha sa kolehiyo ug una kining hugna sa mga skolar ubos sa Team Frasco Scholarship Distribution.
Ang 3, 521 ka mga karaan ug bag-ong skolars gikan sa Barangay Catarman, Celero ug Tayud samtang ang 3, 817 gikan sa Barangay San Vicente, Sta. Cruz, ug barangay Yati.
Ang pag apud-apod sa scholarship grant gihimo sa Catarman Integrated School, Tayud Covered Court ug Yati Elementary school niadtong Abril 23 ug ang ikaduhang batch gihimo usab kagahapong adlawa alang sa mga skolar sa barangay Poblacion, Cotcot, Jubay, San Roque, Tabla, Lataban, Mulao ug Cabadiangan.
Samtang midawat na sa tag P5mil nga insentibo ang 31 ka mga board passers nga taga Dakbayan sa Talisay.
Sila ang mga Talisaynon nga nikuha og pasulit sa nagkalain-laing kurso niadtong buwan sa Enero hangtud sa Marso.
Si konsehal Eduardo Digul Gullas III, chairman sa committee on education nipasabot nga gihimo nila ang ordinansa aron paghatag og pahalipay sa kahago ug sakripisyo sa mga nigradwar hangtud nga nakapasar sa board exam.
Si mayor Gerald Anthony Samsam Gullas maoy nangulo sa pag apud-apod sa cash incentives niadtong miaging adlaw.
Matud pa ni Gullas nga ang pagpanghatag himuon sa matag kwarter. Ang mga topnotcher sa board ug bar exam lahi sab ang ilang madawat. Ang top 1 makadawat og P100,000; top 2 modawat og P90,000; ang top 3, P80,000; top 4 modawat og P70,000; P60,000 para sa top 5; P50,000 ang top 6; P40,000 top 7 dayon P30,000 para sa top 8 unya P20,000 sa top 9 ug P10,000 para sa top 10. (BANAT NEWS)
- Latest
