Dul-an 50 ka residente nakakompleto sa urban agriculture training

CEBU, Philippines — Dul-an sa 50 ka residente gikan sa duha ka barangay sa dakbayan sa Sugbo ang nakakompleto sa 14-week urban agriculture training diin sila gibansay alang sa urban gardening.

Ang mga partisipante naglangkub sa 27 ka indibidwal gikan sa barangay Mambaling ug 21 gikan sa barangay Carreta.

Segun sa tahu sa news and information team sa dakbayan, ang programa gipasiugdahan sa SMFI, ang social good arm sa SM Group of Companies.

Lakip sa ilang gihimo mao ang pagbansay sa mga urban farmers kabahin sa kalambuan sa teknolohiya, capacity building, financial literacy, livelihood development, market opportunities, ingon man aron mahimong potential agripreneur.

Ang SM Group founder, nga si Henry Sy maoy nagsugod sa programa niadtong 2007 nga nag-umol og sustainable program nga maoy mo-update sa farming skills, seguridad sa pagkaon, sustainable livelihood know-how of low income farmers aron mo-asenso ang ilang kahimtang sa kinabuhi.

Uban sa SMFI, ang programa giabagan usab sa City Agriculture Department, Department of Agriculture, Department of Labor and Employment; Department of Trade and Industry; ug sa Technical Education and Skills Development Authority (TESDA).

Ang moving up ceremony alang sa “Kabalikat sa Kabuhayan on Sustainable Agriculture” program gihimo diha sa SM Seaside City diin ang mga participants nakadawat sa National Certification 2 assessment in Organic Agriculture gikan sa TESDA.

Atol sa kataposang adlaw sa training, si City Agriculturist Joelito Baclayon nipadayag ngadto sa mga graduates nga ang ilang buhatan mohatag og ayuda sa mga participants aron molambo ang ilang urban gardening skills pinaagi sa paggamit sa South Road Properties farm. “We will give you a shuttle para pag-transport sa inyo mga participants. And all the rest nga gusto moanha diha pick-up-pon sa inyong lugar and dad-on ta mo sa farm. Pagkahapon mobalik pod mo sa inyo,” suma pa ni Baclayon.

Subay niini ang CAD mipasalig nga magbutang og mas daku nga nursery diha sa SRP.

“To ensure pa gyud nga naa gyud moy klaro didto nga supply sa inyong gikinahanglan like the seedlings, the fertilizers, including the technology, magbutang pod ko didto og dako-dako nga nursery,” segun pa ni Baclayon. The Freeman