CEBU, Philippines — Lima ang naangol sa panagbangga sa usa ka pribadong sakyanan ug public utility jeepney diha sa MJ Cuenco Avenue, Barangay Hipodromo, siyudad sa Sugbo, pasado alas 2 sa kaadlawon kagahapon, Sabado, Abril 20, 2024.
Ang PUJ gimaneho ni Napoleon Andrino Toleno, 57-anyos, residente sa Ponce Compound 2, MJ Cuenco Avenue, Barangay Carreta, Siyudad sa Sugbo samtang ang driver sa van mao July Louie Cabra, 22 anyos, nagpuyo sa Talisay City.
Nasayran nga ang PUJ dunay sakay lima ka mga pasahero nga sila si Rolita Dacalos 40 anyos; Robio Leo Rag, 36 anyos; Marife Parami, 44 anyos; Jenyl Desalas, 31 anyos ug Zaineth Ann Lepiten, 23 anyos.
Sa imbestigasyon sa Traffic Enforcement Unit sa Cebu City Police Office (CCPO) ang PUJ ug pribadong sakyanan gadahan sa pareho nga direksyon duha sa MJ Cuenco Avenue pa South bound.
Apan pag-abot nila sa naasoy nga dapit nadumbolan kini sa pribadong sakyanan diha sa luyo.
Gumikan sa impact ang tanang pasahero sa PUJ nakaangkon og angol sa kalawasan hinoon si Lepiten lang ang gidala sa tambalanan.
Kasamtangan karon nga natanggong sa custodial facility sa Traffic Enforcement Unit ang drayber sa pribadong sakyanan ug posible kining mag-atubang og kasong Reckless Imprudence Resulting in Multiple Physical Injuries and Damate to Property.-- IBM BANAT NEWS