CEBU, Philippines — Nagtingkagol karon sa prisuhan ang usa ka 23 anyos nga lalake human misulod og balay ug gikuha ang parcel ug gibaligya kini diha sa 402 Spoliarium Street, Barangay Duljo Fatima, siyudad sa Sugbo pasado alas 5 sa buntag kagahapon, Sabado, Abril 20.
Ang dinakpan mao si Christian Casquero Musolino, 23, taga Probinsiya sa Bohol apan kasamtangan nga nagpuyo sa Sitio Micabaja, Barangay Duljo Fatima samtang ang iyang gibiktima usa ka 42 anyos nga babayeng nagpuyo sa maong lugar.
Sa impormasyon sa Mambaling Police Station 11 pinangulohan ni Major John Lynbert Yangco nisulod ang suspect sa panimalay sa biktima ug gikuha ang niabot nga parcel ug gibaligya kini.
Ang sulod sa maong parcel kay karsones nga tag P4,500; Blouse nga P6,200 ang presyo, karsones nga P3,200 ug laing branded nga pants nga tag P2,595 diin ang tanan mokantidad og P16,495. Gawas niini, nakuhaan sab kini og duha ka kilong bronze nga nagkantidad og P780.
Ang biktima maoy matud pa tighatag og pagkaon sa suspek kay wa kini trabaho.- IBM BANAT NEWS