CEBU, Philippines — Gihugopan sa mga langyaw ug lokal nga dumuduong ang grand opening sa Kadaugan Food Festival sa Siyudad sa Lapu-Lapu nga giapilan sa gatusan ka inila nga dagkong hotel pinaagi sa pag-display sa ilang pagkaon nga mapalit lang sa barato nga presyo.
Si Kongresista Cindi King-Chan nagkanayon nga ang gipahigayon nga Kadaugan Food Festival mao usab ang mga higayon nga matilawan sa ordinaryong Oponganon ang mga dekalidad nga pagkaon sa five star hotel and restaurant sa dakbayan diin dili kini mahimo sa naandan nga mga adlaw.
Ang maong mga lamiang pagkaon nga gi-display sa matag booth mahimo lang mapalit sa P50 ngadto sa P300 ang matag putahe. Si Chan nagkanayon nga ang pagpasiugda sa Kadaugan Food Festival nahimo na kining kabahin sa mga kalihokan sa tinuig nga Kadaugan sa Mactan nga molungtad og usa ka semana sa dili pa ang Abril 27.
Nunot niini, dako ang kahigayonan nga motambong si Presidente Ferdinand “Bongbong” Marcos, Jr. sa ika-503rd nga Kadaugan sa Mactan.
Kini ang gibutyag ni Mayor Junard "Ahong" Chan atol sa iyang mensahe sa gipahigayon nga pagbukas sa Kadaugan Food Festival. Matud ni Mayor Chan nga nakadawat na siya og mensahe gikan sa buhatan sa presidente nga ang Kadaugan sa Mactan nalakip na sa mga schedule niini.
Gibutyag ni Mayor Chan nga upat ka dagkong kalihokan ang tambongan sa president diin lakip niini ang ground breaking ceremony sa gitukod nga WCMCH Asean Expo Convention. BDB BANAT NEWS