Pinansyal nga ayuda sa mga seniors sa Mandaue umentohan

CEBU, Philippines — Nagplano si Mandaue City mayor Jonas Cortes nga himoon na nga P10,000 ang madawat nga tinuig nga pinansiyal nga ayuda sa mga senior citizen sa Siyudad sa Mandaue nga magsugod sa tuig 2025.

Ang maong plano gipadayag ni Mayor Cortes atol sa gihimong pagpang-apod-apod sa ayuda sa liboan ka mga senior citizen sa Barangay Tabok nga gipahigayon sa Mandaue City Cultural and Sports Complex kagahapon sa buntag Abril 18, 2024.

Matud pa sa mayor nga iyang nakita nga angayan na nga usbawan ang P8,000 nga madawat sa mga senior citizen sa dakbayan sa matag tuig. Subay niini gihangyo niya ang mga sakop sa konseho nga gipangulohan ni Bise Mayor Glenn Bercede sa pagsuporta sa mao niyang tinguha.

Sa nasayran nga ang dakbayan sa Mandaue adunay 30,000 na ka mga narehistro nga senior citizen gikan sa 27 ka mga barangay.

Sa unang adlaw sa pag-apod-apod sa ayuda maoy gihimo nila ni Mayor Cortes ang ceremonial nga pagpangahatag nga unang higayon kini nga gipahigayon sa Mandaue City Cultural and Sports Complex.

Gipasabot ni mayor Cortes nga ilang gituyo ang pagpanghatag sa ayuda diha sa Sports Compes aron malikay usab sa grabeng kainit ang mga senior citizens.

Gawas niini gitinguha usab sa siyudad nga mahatag ang libreng serbisyo sa mga seniors sama sa medical check-up, libreng vitamins, ug libreng tupi ingon man mga pagkaon sa mga senior.

Ang pag-apod-apod sa pinansiyal nga ayuda hangtud kini sa Abril 29, 2024 ug adunay libreng sakyanan nga giandam ang kagamhanan nga mohatod kanila ngadto sa Mandaue City Cultural and Sports Complex ug mokuha usab kanila alang sa paghatod na sa ilang pagpamauli. (BANAT NEWS)