MANILA, Philippines — Nidangop sa kagamhanan sa Lungsod sa Minglanilla ang 200 ka pamilya nga nagpuyo diha sa Purok Macopa ug Purok Magtalisay sa Barangay Calajoan sa maong lungsod diin ilang gireklamo ang giingong ilegal nga pagkural sa ilang agianan.
Base sa post sa Facebook page sa kagamhanan sa lungsod nga ang maong mga residente nangreklamo tungod kay naapektohan sila sa gitrabahong pagsirado sa yuta nga gipanag-iya sa pamilya usa ka kanhi opisyal sa lungsod.
Ang kagamhanan sa lungsod nipadala sa ikatulong notice of illegal construction sa pamilya sa kanhi opisyal tungod kay wala kini fencing permit gikan sa munisipyo.
Giingong ang maong kanhi opisyal dihang nahinabi sa Office of the Building Officials (OBO) sa lungsod nibahad nga mopasaka og kaso kong ipahunong ang gitrabahong pagkural sa lugar.
Naalarma usab ang mga residente sa Purok Macopa ug Purok Magtalisay tungod kay adunay mga armadong mga security guard diha sa lugar.
Niadtong Hunyo 2023 ug Marso 24 niining tuiga gipadala sa lokal nga kagamhanan sa Lungsod sa Minglanilla ang first ug second notice aron ipatangtang ang kural tungod kay walay fencing permit apan giingong padayon gihapon ang pag-ugmad sa lugar. (BANAT NEWS)