CEBU, Philippines — Giluwatan sa buhatan sa City Traffic Management System (CTMS) ang traffic advisory alang sa pagahimoon nga Ironman 70.3 triathlon event sa Abril 21, 2024 sa siyudad sa Lapu-Lapu.
Sa nasayran ang Ironman giila nga labing dako nga triathlon race dinhi sa nasud nga ibalik sa pagpahigayon dinhi sa Sugbo.
Segun sa traffic advisory gipahibawo nga sa maong adlaw sugdan ang lumba sa alas 4 ang takna sa kaadlawon ug matapos kini alas 2 sa hapon.
Sugdan ang kompetisyon pinaagi sa paglangoy sa 1.9 kilometer nga gilay-on sa kadagatan sa Newtown Mactan ug isunod ang pag bisiklita sa 90 ka kilometro nga gilay-on nga motadlas sa makasaysayanong mga dalan sa Mactan paingon ngadto sa Cebu Cordova Link Expressway (CCLEX Bridge) paingon sa siyudad sa Sugbo.
Mobalik kini sa siyudad sa Lapu-Lapu pinaagi sa pagdagan sa 21.1 kilometro nga gilay-on hangtud na sa paghidangat sa finish line.
Nunot niini gipahibalo sa buhatan sa CTMS ang mga motorista sa pagsirado sa mga dalan nga naglakip sa Barangay Punta Ingano, Mactan, Mafribago, Agus, Marigondon ug Suba-Basbas paingon na ngadto sa lungsod sa Cordova. (BANAT NEWS)