CEBU, Philippines — Gitugot na sa kagamhanan sa Siyudad sa Lapu-Lapu sa buhatan sa City Traffic and Management System (CTMS) ang temporaryong pagsirado sa mga dalan paingon ngadto sa Liberty Shrine sa Barangay Mactan sa Abril 19, 2024 nga magsugod sa alas 4 sa hapon hangtud sa alas 10 sa gabii.
Kini maoy kabahin sa himoong pagpangandam alang sa pasiugdahan nga dagkong kalihokan nga naglakip sa Iron Kids sa Abril 19, Bulakna Fun Run sa Abril 20 ug Ironman 70.3 sa Abril 21, 2024.
Sa giaprobahan nga City Ordinance 16-138-2024 sa konseho sa siyudad sa Lapu-Lapu ilang gipasabot nga ang maong mga kalihokan ang tipik usab sa mosunod pa nga tinuig nga kalihokan sa ika -503 nga "Kadaugan sa Mactan sa Abril 27, 2024.
Sa maong mga adlaw masinati ang Full Road closure sa mga dalan sa Punta Inga o gikan sa Mactan Junction paingon sa sitio Mangal gikan sa junction sa Mactan paingon sa Marigondon Intersection hangtud na ngadto sa utlanan nga bahin siyudad sa Lapu-Lapu ug utlanan sa Cordova.
Sa laing bahin nakaani og pagdayeg ang bag-ong gibuksan nga Skate Park sa Dakbayan sa Talisay. Usa ka netizen nihulagway nga ang proyekto sa siyudad naghatag og kalipay sa mahiligon sa skateboarding.
Gipadayag sab nga di na mameligro ang kaluwasan sa mga mahiligon sa skate tungod kay di na sila magpahigayon sa duwa diha daplin sa karsada.
Gikalipay usab ni Talisay City mayor Gerald Anthony Samsam Gullas nga daghan ang nahimuot sa ilang proyekto.
Matud pa niya nga ang ilang proyekto di lang sa mahiligon sa skate kundi mao sab kini ang makapahiusa sa pamilya.
Sa panahon karon nga daghan na ang kompetinsya sa atensyon sa kabataan, ang dako nga hawan maghatag sa pamilya ug managhigala sa pagpahimulos sa higayon aron magkabonding. (BANAT NEWS)