Langyaw nagmaoy gidakop sa landlord

CEBU, Philippines — Gidakop sa tag-iya sa boarding house diha sa Bonifacio Street, Barangay Day-as, Dakbayan sa Sugbo ang usa ka langyaw gumikan kay nagmaoy kini dihang nahubog ug nangguba sa mga gamit niadtong Lunes sa gabii.

Ang suspetsado mao si Michael Omene, 22-anyos, Papua New Guinean.

Base sa imbestigasyon sa Parian Police Station sa Cebu City Police Office (CCPO) nasuta nga human sa paniudto nag-inom si Omene uban ang mga higala niini.

Ug dihang nahubog na ang maong langyaw nagmaoy kini hinungdan nga ang tag-iya sa boarding house nagpakitabang sa kapolisan.

Mga alas 7:00 sa gabii ang hubog nga suspetsado nagsige og sulod ug gawas sa kwarto niini

Pagka-alas 10:00 sa gabii sa maong adlaw giingong dili na mapugngan ang langyaw ug nangguba na kini og gamit sa iyahang kwarto ug giapil pa ang kwarto sa ubang boarders diin gipangguba niini ang pultahan.

Si Omene nakamugna og dakong danyos diin ang kabinet sa kwarto niini naguba, ang bongbong nabuslot ug ang iyang personal nga gamit nagkatag sa sawog.  Girespondehan kini sa kapolisan ug karon natanggong ang suspetsado diha sa detention cell sa Parian Police Station.

Nasayran nga ang maong langyaw nadakpan na kini sa Parian Police Station niadtong buwan sa Agosto sa niaging tuig tungod kay nanglabni kini og cellphone.

Giingong niadtong higayona nagduwa og mobile legend ang tag-iya sa cellphone ug kalit lang kining gilabni sa suspetsado.

Samtang ang suspetsado nangangkon nga napulo ka buwan na siya dinhi sa Sugbo tungod kay nagtungha kini. BDB BANAT NEWS