CEBU, Philippines — Pasakaan og kasong reckless imprudence resulting to homicide and serious physical injury sa kapolisan ang PUJ driver nga nakaingon sa kamatayon sa asawa ug grabeng pagkaangol sa bana sa nahitabong panagbangga niini diha sa dalan M.L. Quezon sa Barangay Ibo, Siyudad sa Lapu-Lapu niadtong Lunes sa buntag.
Si Police Colonel Christian Torres, tigpamaba sa Lapu-Lapu City Police Office (LCPO) niila sa namatay nga mao si Susan Torregosa, 61-anyos (nasipyat ang unang balita nga ang bana maoy namatay) ug grabe usab nga naangol ang bana niini nga si Desiderio Torregosa, 64 –anyos kinsa anaa pa karon sa tambalanan.
Matud ni Torres nga nagbiyahe sakay sa ilang motorsiklo ang mga biktima subay diha sa nahisgutang dalan paingon sa Barangay Pusok, Dakbayan sa Lapu-Lapu ug nagkabangga kini sa PUJ nga gikasugat.
Matud ni Torres nga mo U-turn unta ang PUJ padulong sa Barangay Ibo dihang gikabangga niini ang motorsiklo.
Nasayran nga patay diha-diha si Susan tungod sa grabeng kadaot nga naangkon niini sa lawas.
Dugang ni Torres nga giandam na nila ang kasong ipasaka batok sa drayber sa PUJ kinsa natingkagol karon sa detention cell sa Lapu-Lapu City Police Office. BDB BANAT NEWS