CEBU, Philippines — Moabot sa P21milyones ang danyos sa bodega nga nasunog sa kimba, Barangay San Roque, Dakbayan sa Talisay niadtong Miyerkules sa gabii.
Nadawat ang alarma sa kabomberohan alas 9:51 sa gabii ug nakontrolar alas 10:45 apan nataudtaoran una hingpit nga napawong sa kayo nga milanat sa alas 4:02 sa kadlawon. Ang bodega adunay sulod nga mga construction supply ug uban pa.
Samtang sa laing bahin, nakadawat na og pinansyal nga ayuda ang mga nabiktima sa sunog sa Barangay Jaclupan, Dakbayan sa Talisay.
Si mayor Gerald Anthony Samsam Gullas maoy nangulo sa pag apud-apod sa ayuda.
Samtang sa laing sunog, miabot sa kapin sa P2.2 milyones ang danyos sa sunog nga niulbo sa Lungsod sa Minglanilla kagahapon sa kadlawon.
Dili mominus 50 ka panimalay ang naugdaw sa sitio Fatima Barangay Linao, sa maong lungsod.
Ang sunog giisa ngadto sa second alarm og nadeklarar nga fire out human sa kapin usa ka oras nga pakigkumbati sa kabomberohan.
Padayon pa nga gisusi sa kabomberohan sa Minglanilla ang hinungdan sa sunog ug lakip sa gitan-aw ang kabahin sa linya sa kuryente sa panimalay diin nagsugod ang kayo.
Dili mominos sa 200 ka individual ang apektado diin ang mga biktima kasamtangan gipahiluna sa Lipata Central Elementary School.
Ang mga opisyal sa Barangay Linao ug Lungsod sa Minglanilla nga gipangulohan ni Mayor Rajiv Enad ang daling nagsabot alang sa dinaliang tabang sa mga nasunogan.
Misuway ug sunog gidakop
Nasikop ang usa ka 46 anyos nga lalake nga giingong misuway og sunog makaduha ka higayon sa usa ka unibersidad nga nahimutang sa P. Lopez Street, Barangay Kalubihan, siyudad sa Sugbo atbang sa Carbon Public Market.
Ang gwardiya sa unibersidad ang nagdakop sa suspek nga si Alejandro Bernardo Langi, wala y trabaho ug residente sa Barangay Dasulpan Lutopan, Dakbayan sa Toledo.
Suma ni Police Master Sergeant Joel Perolino, imbestigador sa Carbon Police Station nga base sa gisulti sa gwardiya alas 5 sa buntag sa Miyerkules dunay nisuway og sunog sa tunghaan. Giingong giduslitan sa suspek ang karton ug gitagak kini padulong sa sulod agi sa decorative concrete nga koral sa unibersidad.
Wala makadako ang sunog tungod kay natabang man dayon kini sa mga gwardiya ug personnel sa tunghaan.
Dihang nahinabi sa kapolisan ang dinakpan wala kini mosulti kun nganong iya kining gihimo ug miingon nga igo ra siya nanagkot.
Ang management sa unibersidad mopasaka og kasong Attempted Arson batok sa suspetsado. Rowena D. Capistrano, Decemay P. Padilla (BANAT NEWS)