CEBU, Philippines — Pugsanong gipahunong sa kagamhanan sa Dakbayan sa Sugbu ang matud padayong pag-ugmad sa port extension nga gibuhat sa Cebu Port Authority (CPA) pinasikad sa work stoppage nga giluwatan sa siyudad.
Kagahapong adlawa, Lunes, Abril 1, 2024 atol sa press conference si Cebu City Mayor Michael Rama mimando sa pagpadala og mga sakop sa Cebu City Police Office sa Campaña Maritima tungod sa matud pa padayong konstruksyon diha sa dagat tupad sa Malacañang sa Sugbo.
“Let all the police convene now at CPA, all. Now. Leave all the stations with people,” si Rama samtang nipagawas sa kamandoan tungatunga sa press conference.
Nianang pagka-udtong tutok naobserbahan ang pagabot sa mga polis diha sa maong dapit. Ug pagka alas 3 sa hapon, ang siyudad kauban sa Office of the Building Official (OBO) inabagan sa City Legal, CCPO, traffic personnel, CDRRMO, ug PROBE mipatuman sa notice of work stoppage order tungod sa matud pa pagpadayon nila og tukod sa maong pantalan bisan gibadlong na sila sa OBO tungod wala silay building permits.
Ang mga gwardiya nga gi-hire sa CPA mibabag sa mga opisyales sa siyudad apil na ni Architect Florante Catalan, ang pangulo sa OBO, ug City Legal Officer Attorney Carlo Vincent Gimena.
Human sa pipila ka minutong pagpaabot, giingong mimando si Cebu City Administrator, Attorney Collin Rosell nga ipatuman ang force entry sa lugar pinaagi sa pagguba sa usa ka bahin sa gate.
Human niini, gibutangan og railings ang utlanan sa lugar diha sa mismong baybayon ug gimuntar ang dakong karatola sa notice of work stoppage.
Si Rosell miklaro nga “enforcement” lang sa balaod ang ilang gipatuman, napugos sila sa pagguba sa gate tungod kay gibabagan man silang makasulod aron ipatuman ang balaod.
“In fact sa among atubangan, mura tag giunsulto, gi padlock-kan naman hinuon (gates),” matud ni Rosell.
Matud ni Rosell nakaako gihapon pagbuhat niini ang CPA bisan og makadaghan na sila gipadad-an og notices of violations, notices of stoppage, ug giisyuhan og cease-and-desist orders.
“Padayon sila nga nagbuhat (construction) unya nipaspas na hinuon og construct. Laktod pagkasulti di na gyud na maayo nga imong gobiyerno mismo, gobiyerno sa katawhan yaga-yagaan ra,” matud ni Rosell.
Siya midugang nga nagtuman ra gyud sa ilang gusto ang CPA ug wala na motahod sa balaod ug walay respeto sa gobiyerno.
“Gawas pa ana niana, kaning lapyahan, kani sang dagat, dako na siya kaayo og gamit labi na kay naa na sa atong municipal waters, dako kaayo na og gamit sa atong mangingisda,” matud ni Rosell.
“Ila ng gi privatize and dalan, di man na pwede,” puno pa niya.
Sa buwag nga interbyu, si Gimena mingon nga si Catalan nagbuhat lang sa iyang tahas ang paghimo og inspeksyon ug ipatuman ang work stoppage order inabagan sa city legal.
Ang OBO miisyu og notice of violation for illegal construction batok sa CPA niadtong Pebrero 2, 2024, ug niadtong Pebrero 5, 2024 giisyuhan sab og laing notice of illegal construction ug work stoppage order apan wala gihapon kini tahura sa CPA.
Ang OBO mipasaka na og kasong kriminal ug administratiba sa kanhi ug kasamtangang General Manager sa CPA niadtong Marso 15, 2024. Ang gikasohan mao sila si kanhi CPA general manager Glenn Castillo ug ang nipuli kaniya nga si Francisco Cañete Comendador III. (BANAT NEWS)