IC misuporta sa Kapitolyo sa paghatag og insurance sa mga kawani .

CEBU, Philippines — Walay nakita nga pagdili o kalapasan ang Insurance Commission sa plano sa Probinsya sa Sugbo pag establisar og kaugalingong insurance system alang sa mga empleyado niini ug mga opisyal.

Si Atty. Terence Vanessa Tomol, OIC sa Insurance Commission (IC) Cebu District Office nagkanayon nga walay problema sa rehistrasyon sa Probinsya ngadto sa IC alang sa maong programa.

“The Insurance Commission has pledged its full support to Cebu Province in this endeavor,” matud ni Tomol atol sa tigom nila ni gobernador Gwendolyn Garcia niadtong Marso 27.

Tinguha sa Kapitolyo nga mo- apply alang sa Life Insurance, Non-Life Insurance, ug Health Maintenance Organization (HMO) coverage.

Ang gipropose nga insurance division maoy modumala sa Sugbo Segurado program, kon diin maapil niini ang mga empleyado ug opisyal sa Sugbo apil na ang gobernador, bise gobernador ug mga bokal.

Lakip usab sa programa ang mga mayor, bise mayor, konsehal, opisyal sa barangay, barangay treasurers, barangay secretaries, ug volunteer barangay workers sama sa barangay health workers, barangay nutrition scholars, lupon tagapamayapa, tanod, GAD focal persons, Day Care Workers, ug traffic enforcers sa 1,066 ka mga barangay lukop probinsya sa Sugbo.

Ang mga teaching ug non-teaching personnel sa DepEd Cebu Province, presidents sa Parent-Teacher Associations sa DepEd Cebu Province, ug canyoneering guides sa Badian ug Alegria masulod usab sa insurance ubos sa maong programa.

Sumala sa IC nga ang Probinsya sa Sugbo maoy unang local government unit lukop nasud nga nihimo sa maong inisyatiba paghatag og insurance sa mga empleyado niini. (CEBU NEWS)