CEBU, Philippines — Hingpit na nga migradwar sa 4Ps program ang 266 ka pamilya sa Siyudad sa Mandaue nga gikan sa nagkalain-laing barangay nga nakalampos na isip benepisyaryo sa Pantawid Pamiyang Pilipino Program sa gobyerno.
Ang mga benepisaryo nga migradwar sa 4PS Program wala na magsalig sa tabang sa maong programa nga gipasiugdahan sa nasudnong kagamhanan.
Kini human sila makabaton og katakus sa pagkab-ot sa ilang panginahanglan human nakapa edukar sa ilang mga anak ug nakatukod na sa ilang kaugalingon nga mga panginabuhian.
Kun adunay mo-graduate isip 4PS beneficiaries, nanumpa usab ang 793 ka bag-ong mga 4Ps member beneficiaries.
Ang bag-ong mga benepisyaryo nisaad sa pagbuhat sa tanan alang sa kaayohan sa pamilya ug mga anak, ug sa komunidad.
Nitambong sa seremonyas si City Councilor Jimmy Lumapas, ang Committe on Social Services ug uban pa nga mga sakop sa konseho sa dakbayan sa Mandaue.
Apil sa mitambong sa kalihokan mao ang 4Ps Program Coordinator Jiah L. Sayson, Regional Director, Region 7 Shalaine Marie Lucero, Career Executive Service Officer IV, Dr. Bianito Dagatan, Schools Division Superintendent ug mga kubang kawani sa DSWD. (CEBU NEWS)