Tulisan gi-nerbiyos nakaangol
CEBU, Philippines — Padayong gipangita sa kapulisan sa Siyudad sa Sugbo ang tulisan nga miangol sa usa ka pasahero human iyahang nakablitan ang armas atol sa pagpanulis nga nahitabo diha sa New Imus Road corner General Maxilom Avenue, Barangay Lorega San Miguel, siyudad sa Sugbo niadtong Miyerkules sa gabii sa alas 7 sa gabii.
Ang biktima nga nalandig sa tambalanan mao si Jemelita Balaba Salvador, 26, lumad nga taga Maasin City, Southern Leyte apan kasamtangan nga nagpuyo sa Nisipit, Talamban.
Samtang ang wala mailhing suspek nagsul-ob og itom nga sweat shirt, itom nga kalo, brown nga cargo pant, medium built ug gibana-bana nga 5’6’’ ang gitas-on ug naa sa 30 ngadto sa 40 anyos ang edad ug dunay sun flower tattoo tuo nga kamot.
Matud ni Police Major Henry Orbiso, hepe sa Parian Police Station 1 nga ang biktima ug suspek parehong sakay sa Public Utility Vehicle (PUJ) nga paingon ang rota sa Talamban.
Apan pag-abot may New Imus Road MJ Cuenco nisuway matud pa og panulis ang suspek, apan giingong gi-niyerbyos kini ug sa iyang karatol nakablitan niini ang pusil ug naigo sa liog ang biktima.
Ang tulisan dalidaling nikanaog ug nisakay og laing pasaheroan gikan MJ Cuenco paingon sa Carbon Public Market ug Manalili ug wala na igkita pa.
Padayon pa ang kapolisan sa pagpangita sa maong tulisan samtang nagpaalim pa sa tambalanan ang iyang biktima
- Latest
