Nalambigit sa rambol duol sa bar gipangita sa kapolisan
CEBU, Philippines — Gipangita na sa kapolisan sa Cebu City Police Office (CCPO) ang mga indibidwal nga nalambigit sa sukmagay diha duol sa usa ka bar sa Barangay Lahug, Siyudad sa Sugbo niadtong Sabado sa buntag.
Ang sukmagay sa grupo sa mga lalaki nakuhaan og video ug nag-viral kini sa Facebook.
Makita sa video nga duha ka lalaki nga nag t-shirt og puwa ug laing duha ka lalaki nga nagputi ug gray t-shirt ang nagsumbagay diin usa kanila ang natumba ug ang maong insidente naabot sa CCPO.
Matud ni Police Lieutenant Colonel Janette Rafter, deputy city director for operations sa CCPO nga padayon ang pag-ila sa maong mga lalaki.
Nanawagan ang CCPO sa katawhan nga nakaila sa maong mga nagsumbagay nga magpahibawo kanila o mo-message sa mga social media pages sa mga police station sa Cebu City kini aron mahatagan og leksiyon sa kapolisan.
Gibutyag ni Rafter nga mando ni Police Colonel Ireneo Dalogdog, direktor sa CCPO nga kon adunay mga karambola nga mahitabo sa siyudad bisan og naghusay ang duha ka habig pasakaan gihapon nila og kasong alarm and scandal aron dili sundon sa uban.
"Ato gyud ni sila patubagon sa pag-cause nila og disorder ug kanang pag-threat sa security sa mga tawo niadtong establasamento", padayag ni Rafter.
Ug giingong mas labing maayo nga ang mga nalambigit sa rambol boluntaryo nga moadto sa mga police stations aron madungog ang ilang mga habig. (BANAT NEWS)
- Latest
