CEBU, Philippines — Nagpahinumdom ang mga opisyales sa Barangay Bulasa, Lungsod sa Argao sa mga tawo nga dili taga Barangay Bulasa nga moagi una sa barangay kun dunay mga katuyuan diha sa ilang dapit aron dili kini makahatag og kahadlok sa nga tawo.
Ang maong pahinumdom nagumikan sa insidente nga nahitabo niadtong adlaw'ng Huwebes sa alas 7 sa gabii.
Sigon ni Bulasa Barangay Councilor Wilmar Cambarijan kinsa mao sab ang chairman sa Committee on Peace and Order nga nakabantay ang mga residente nga naay tulo ka tawo nga nigawas sa kalibunan.
Nikuha matud pa og motor unya gitulod patangas sa bungtod nga bahin sa Tiposo, Barangay Bulasa.
Paglabay sa pila ka minutos nawala ang maong mga lalake hinungdan nga nanawag ang mga residente og tanod ug dali usab nga miadto sa lugar si konsehal Cambarijan isip siya ang chairman sa Peace and Order Committee.
Gipangita nila ang motor ug milabay nalang ang 30 minutos wala gyud nila kini makita.
Apan miiwag ang flashlight sa ibabaw nga bahin maong misinggit sila nga panaugon ug didto nahibaw-an nga nanguha diay og damang ang tulo nga nahibaw-an nga taga Barangay Saksak, Lungsod sa Dalaguete.
"Mao gipapauli namo kay kuyaw ang panahon, mao hangyo ko ayaw mo dritso og unsay tuyo ninyo mag agi mo sa barangay or ayaw nalang sa karon kay kuyaw ang panahon", suma pa ni Konsehal Cambarijan.
Gipasabot sa konsehal nga alerto sila tungod kay daghan ang giingon nga manuktok sa ilang lugar.
"Naa pero wala pami nasakpan pod...maong alerto mi karon, ug kay mas nindot ning wala pa nahitabo naka pangandam na", pasabot sa Konsehal. — /MEL (BANAT NEWS)