Mga HVI sa kampanya batok ilegal nga drugas nadakpan  

CEBU, Philippines — Miresulta sa pagkasikop sa usa ka High Value Individual ug laing tulo ka mga tawo ang duha ka anti-illegal drug operations sa Philippine Drug Enforcement Agency(PDEA)-7 sa Lapu-Lapu City ug Tagbiliran City sa Probinsiya sa Bohol sa miaging adlaw.

Nagpahigayon og buy-bust operation ang PDEA Lapu-Lapu City Team uban ang LCPO Station 3 sa Purok Narra, Barangay Poblacion, Lapu-Lapu City diin nadakpan nila ang high-value target nga si Ma. Analiz Tanya Alcantara, 40.

Nakompiskar gikan sa dinakpan ang duha ka putos sa gituohang shabu nga nitimbang og 50 gramos ug mobalor og P340,000, buy-bust money ug improvised tooter.

Nadakpan na sab kini niadtong 2022 gumikan gihapon sa kalambigitan sa drugas ug naka-plea bargain. Sa Lapu-Lapu City ug Mandaue City matod pa ang area of operation sa suspek.

Nadakpan sab sa buy bust operation sa  mga polis sa Mandaue City Police Office (MCPO) ang usa ka  36 anyos nga High Value Individual ug nasakmit ang gidala niini nga 100 gramo nga shabu nga nagkantidad og P680 mil.

Kini maoy labing unang HVI nakuhaan og susamang gidaghanon nga shabu sukad sa pag-asumir  sa bag-ong direktor sa MCPO nga si Police  Colonel Juluis Sagandoy.

Ang nadakpan giila lamang sa iyang pangalan nga "Anden" (apelyido gipugngan) nga molupyo sa Barangay Alang-Alang sa maong dakbayan.

Si Sagandoy miingon nga ang kapolisan sa MCPO ang magpadayon sa kampanya kontra krimen ug pagkuyanap sa ilegal ng drugas.

Nunot niini iyang giawag ang publiko sa pagtaho gilayon sa ilang buhatan kun adunay grupo sa mga tawo nga kadudahan ang mga lihok niini.

Sa laing operasyon, usa ka  40  anyos nga  inahan  nga pusher ang nadakpan sa hiniusang buy bust operation sa mga sakop sa Philippine Drug Enforcement Agency (PDEA)  7 ug kapolisan sa Lapu-Lapu City Police Office (LCPO) ug nasakmit gikan niini ang 50 gramo nga shabu nga nagkantidad og P340,000 base sa Dangerous Drug Board (DDB)  value niini.

Gipangulohan ni PDEA  7 Agent Investigator  Polinar  ug  kapolisan sa LCPO ang buy bust operation nga ilang gipahigayon sa Barangay Pobalacion alas 10  pasado ang takna sa miaging Biyernes sa gabii Marso 22, 2024

Sa pagsukisukit nga gihimo sa maong dinakpan kini  mitug-an nga duha na ka tuig ang nakalabay kini nadakpan na sa mga polis sa Mandaue City Police Office (MCPO)  sa checkpoint nga nakuhaan usab og shabu.

Nabalhog kini sa Mandaue City jail apan nakagawas human usab sa pagserbisyo sa salaod niining nahimo.

Samtang sa Bohol, sa samang adlaw ang mga operatiba sa PDEA Bohol Provincial Office uban ang PDEU-BPPO, Bohol MARPSTA, NAVFORCEN ug Tagbilaran City Police Station nihimo og buy-bust operation sa Purok 5, Barangay Dampas, Tagbilaran City nga miresulta sa pagguba sa drug den ug pagdakop sa tulo ka indibidwal.

Nadakpan ang subject sa operasyon ug drug den maintainer nga si Nelson Jumarito, 41 anyos, janitor apil na sab ang duha ka tigbisitahan sa drug den nga sila si Andre Joseph Cubeta, 40 anyos, IT Programamer ug Mark Lester Comiso, 29 anyos, promodiser.

Nakuhaan ang mga dinakpan og pito ka putos sa gituohang shabu nga niabot og 7 grams ug nagkantidad og P47,600, buy-bust money ug nagkalain-laing drug paraphernalia.— IBM BANAT NEWS