Rama mikiha ni Garcia

CEBU, Philippines — Gitinuod na gyud ni Cebu City Mayor Michael Rama ang dili palang dugay mga nanglabay nga mga adlaw sa iyang bahad nga duna kini pasakaan og kaso nunot sa pagpanghilabot sa giugmad nga Cebu Bus Rapid Transit project.

Si Rama misang-at og kasong administratiba batok kang Cebu Governor Gwendolyn Garcia  diha sa Office of the President  tungod sa matud pa  “usurping judicial and/or quasi-judicial powers over a national project”  nga para sa mga Sugbuanon, kini mao ang CBRT.

Kahinumdoman nga si Garcia miisyu og cease-and-desist order batok sa  contractor sa maong proyekto sa miaging buwan.

Sa nanglabay nga mga buwan ug nanglabay pa gyud nga katuigan, nakita si Rama nga mitabang ug misuporta sa mga polisiya ug mga desisyon ni Garcia, gani gitawag pa niyang “igsuon” ang gobernador.

Kini bisan pa og makadaghang higayon nga gibalewala ang iyang gihimo o wala suklii sa probinsya ang iyang suporta ilabi na sa nakalabay nga duha ka tuig, partikular ang Sinulog festival tungod kay anha gipahigayon sa South Road Properties.

Apan karon, daw “no more nice guy” na si Rama, nasangko na sa limitasyon iyang pagpailob ug mipasaka na og kaso batok kang Garcia.

Ang mayor kinsa toa karon sa Taiwan aron pagtambong sa 2024 Smart City Summit and Expo, misan-at sa kaso tungod sa matud pa abuse of authority, oppression and grave misconduct, violation of the Code and Ethical Standards for Public Officials, ug violation sa Anti-Graft and Corrupt Practices Act.

Si Rama miingon nga ang gibuhat sa gobernador diha  “an act that would set a dangerous precedent and evince a chilling effect on the extent of a provincial governor's administrative powers over local affairs."

Si Garcia sa iyang bahin miisyu sa maong cease and desist order human nakita nga ang nagpasiugda sa proyekto kuwang og mga permiso gikan sa National Historical Commission of the Philippines (NHCP) pagtukod og estraktura diha sa Osmeña Blvd. atubangan sa Capitol Building.

Kini human si Jose Eleazar Bersales, Capitol consultant for heritage and museums  ug sakop sa National Commission for Culture and the Arts (NCCA) Advisory Board mipahibalo sa gobernador bahin sa posibleng kalapasan sa maong proyekto sa Philippine Heritage Law.

Kay ang maong mga estraktura naa sa atubangan sa Capitol Building nga maisip nga heritage zones.

Ang CBRT project parte sa priority projects ni Presidente Ferdinand ‘Bongbong’ Marcos  isip “gasa para sa mga Sugbuanon”, gani siya mismo ang nanguna sa ground-breaking niini.

Sa pikas bahin, si Garcia nagdumili pagkomento bahin sa kaso, apan si Atty. Donato Villa, provincial legal officer , miingon nga ang memorandum sa gobernador pagpahunong sa pagtrabaho sa CBRT sa Osmeña Blvd atubangan sa Capitol "an act as steward of the properties of Cebu Province. It is the right of the property owner to stop it" ug dili pagpanghilabot ngadto sa Cebu City.

Matud ni Villa wa moabusar sa gahum ang gobernador, gibuhat lang niini iyang obligasyon.

"If she did not take action, it would be dereliction of duty on her part man sad because she is not protecting the property," matud ni Villa sa The Frreman/Banat Rama. -- Le Phyllis Antojado-Orillaneda ug Iris Hazel Mascardo IBM  BANAT NEWS