CEBU, Philippines — Nagpatabang ngadto kang Lapu-Lapu City Mayor Junard "Ahong" Chan ang mga molopyo sa Barangay Punta Ingano nga naapektohan sa giingon nga nagpadayon nga shipwrecking works sa M/V Diamond Highway nga gituohang maoy hinungdan sa kamatayon sa 4 anyos nga batang babaye nga nasakit og pneumonia.
Si Liza Mabua, usa sa mga molopyo nga naapektohan nga nahinabi sa mga tigbalita miingon nga bisan kon adunay kamandoan si Mayor Chan sa pagpahunong a ship-wrecking operation apan ilang namatikdan nga kini nagpadayon panahon sa gabii.
Dugang pa niya nga gumikan niini ilang nasinati karon ang pag-ubo-ubo ug gitakboyan usab sila og sakit sa panit tungod sa nanglupad nga mga fiber dust nga ilang mahanggap ug mopilit sa ilang panit.
Si Mabua miingon nga tinguha nilang katabangan sa kagamhanan sa siyudad sa Lapu-Lapu alang sa pagpatambal sa gihambin karon nilang balatian.
Gikompirmar usab ni kanhi Punta Ingaño Barangay Kapitan Josie Hayashi ang pagbalik sa ship-breaking operation nga gipahigayon sa M/V Diamond Highway.
Matud pa niya nga panahon sa gabii ilang namatikdan nga himoon ang operasyon ug manggawas usab ang dagkong mga sakyanan nga nagkarga sa mga tipaka sa maong giguba nga barko
Si Richard Ando sa buhatan sa "Isumbong Mo kang Mayor" miingon nga gihimo na nila ang subli nga pag-awhag nga pagpahunong sa operasyon ug ilang gihatagan og usa ka semana nga lugway ang mga nagdumala sa maong shipping company.
Nunot niini iyang giawhag ang mga molopyo sa pagtaho gilayon ngadto sa ilang buhatan kon makamatikod sila nga nagpadayon ang operasyon nga maoy ilang pagabasehan sa sunod nga mga lakang nga ilang himoon. MEL BANAT NEWS