CEBU, Philippines — Patay ang usa ka motorista human kini nabangga sa gikasugat niining Toyota Vios nga sakyanan samtang nagbiyahe diha sa H. Mall Road, Barangay Pajac, Siyudad sa Lapu-Lapu kagahapon sa buntag.
Si Police Chief Master Sergeant Rhymond Sosmena, imbestigador sa Traffic Enforcement Unit sa Lapu-Lapu City Police Office (LCPO) niila sa namatay nga mao si Roger Cavan Valiente ,Jr., 30-anyos, minyo, taga Sitio Abuno, Barangay Pajac, Siyudad sa Lapu-Lapu.
Matud ni Sosmena nga ni-overtake sa laing sakyanan ang biktima ug gikasugat niini ang Toyota Vios nga nga gimaneho ni Norhan Inrahim Manongiring, 24-anyos, taga Sitio Matumbo, Barangay Pusok sa maong dakbayan.
Gumikan sa ka kusog sa impact sa maong panagbangga ang biktima nalamba ngadto sa karsada ug nakaangkon og grabeng kadaot sa lawas.
Daling gidala diha sa Mactan Doctors Hospital sa Barangay Basak sa maong siyudad ang biktima apan gideklara kini ni Dr. Sonny Alorvida nga patay na nga naabot sa tambalanan.
Dugang ni Sosmena nga si Manongiring ang kasamtangan nilang gikustodiya.